比較

其實而個本來係睇左ck老闆最新post既留言，不過越寫越長，乾脆變成一個post.

當大家都讀緊書既時候，係好單純既，比較既，最多咪係成績．到大家都畢左業出來做野之後，每個人都有唔同既際遇．有人一帆風順，有人跌跌撞撞．

話完全無比較，咁就真係無可能．我都有段時間，會問點解依個朋友份份工都做唔長，果個朋友個乜唔鍾意份工又吾轉工；倒轉頭又睇，點解出來做左三幾年野，有ｄ朋友已經買左樓兼升做manager，我又都仲係打份牛工呢？

但係近兩年，我開始發覺自己咁樣比較真係好on居．

咁我有ｄ朋友無乜事業心咁又點呢？佢地開心又豁達，對人真誠吾勢利，我地年紀都吾細囉，仲可以保持到依份真，都算係一項成就嫁．

我有朋友自己做生意仲越做越大，但係個過程既辛苦壓力我又願唔願意承受？我可以收工就係收工，話唔做就辭工，做老闆既朋友又得唔得呢？

依個世界，永遠係人睇你好，你睇人好．在依座山時想去對面既山，比你去到對面山頭時，又會回頭睇返好似都係以前好ｄ．點解唔享受依家擁有既一切，而要周圍同人比較呢？

我地好彩既係，一班朋友都吾係太注重一物質方面既野，去吃飯，係志在食同聚一聚．以前都仲係比較注重去邊度吃得好ｄ坐得舒服ｄ，但係而家，我自己就真係比較想找一個地方坐低，可以傾下計．

前兩個禮拜，我地一班中學同學出來一齊燒野食，在小欖，位位六十八蚊．

服務就一ｄ都無嫁啦，除左會幫你起爐之外，其他攞野食，加炭，揾枱揾凳全部自己來．不過一下子有成十幾廿個舊同學出現，都咪話吾熱鬧呀．只係say hello同update近況，講返ｄ咸豐年既舊事同無聊爛gag，已經好鬼嘈同好開心．

一個人除左揾幾多錢，睇幾大盤生意，有冇專業資格同豪宅之外，其實仲有好多野傾既．我地真係需要咁多物質既比較嗎？

要鬥，不如鬥邊個最開心好過啦！