2007年5月28日 星期一

比較

其實而個本來係睇左ck老闆最新post既留言,不過越寫越長,乾脆變成一個post.

當大家都讀緊書既時候,係好單純既,比較既,最多咪係成績.到大家都畢左業出來做野之後,每個人都有唔同既際遇.有人一帆風順,有人跌跌撞撞.

話完全無比較,咁就真係無可能.我都有段時間,會問點解依個朋友份份工都做唔長,果個朋友個乜唔鍾意份工又吾轉工;倒轉頭又睇,點解出來做左三幾年野,有d朋友已經買左樓兼升做manager,我又都仲係打份牛工呢?

但係近兩年,我開始發覺自己咁樣比較真係好on居.

咁我有d朋友無乜事業心咁又點呢?佢地開心又豁達,對人真誠吾勢利,我地年紀都吾細囉,仲可以保持到依份真,都算係一項成就嫁.

我有朋友自己做生意仲越做越大,但係個過程既辛苦壓力我又願唔願意承受?我可以收工就係收工,話唔做就辭工,做老闆既朋友又得唔得呢?

依個世界,永遠係人睇你好,你睇人好.在依座山時想去對面既山,比你去到對面山頭時,又會回頭睇返好似都係以前好d.點解唔享受依家擁有既一切,而要周圍同人比較呢?

我地好彩既係,一班朋友都吾係太注重一物質方面既野,去吃飯,係志在食同聚一聚.以前都仲係比較注重去邊度吃得好d坐得舒服d,但係而家,我自己就真係比較想找一個地方坐低,可以傾下計.

前兩個禮拜,我地一班中學同學出來一齊燒野食,在小欖,位位六十八蚊.

服務就一d都無嫁啦,除左會幫你起爐之外,其他攞野食,加炭,揾枱揾凳全部自己來.不過一下子有成十幾廿個舊同學出現,都咪話吾熱鬧呀.只係say hello同update近況,講返d咸豐年既舊事同無聊爛gag,已經好鬼嘈同好開心.

一個人除左揾幾多錢,睇幾大盤生意,有冇專業資格同豪宅之外,其實仲有好多野傾既.我地真係需要咁多物質既比較嗎?

要鬥,不如鬥邊個最開心好過啦!

12 則留言:

匿名 提到...

同意!

不過我以為要保持心境平靜,生活安定最重要。要感受到實質的安穩我又會首推儲蓄。

正是各有前因莫羡人,成功非但依靠自身的努力更有賴環境,際遇等其他因素。只要身邊有餘錢,無論多少都是自己的成就。

王老五

s-pig 提到...

同意呀...

人,係應該搵一個可以令自己開心既生活重點去努力,要比較,應該同自己比,要令自己每一日都過得好d,開心d...

麥太 提到...

【Sam先生】:

今日的題目,如果用另一個角度嚟睇,其實是否應為價值觀(選擇)呢?
“比較”是為得出好與不好的區別(因自己的”價值觀”而定。),而得出的區別通常代表會有”選擇”。我覺得只要負責地面對所選擇的後果,就不用為所選擇的前事而感到”岸居”(太負面啦!);因這是你寶貴的人生經歷(不論你是否認為價值觀的改變(成長)是好與壞。)。

大道理(廢話)到此為此。

Samsara 提到...

王老五:有一定既儲蓄,的確係可以買到自由既.不過,幾多至夠?

小豬妹妹:戰勝自己,Yeah!

麥太:其實,我係在你身上學到人係有好多唔同既值價觀,要包容,同埋尊重.

ak 提到...

Samsara姐姐,

AK本身係一個要強好勝既人,所以身邊既朋友圈都係一班好有鬥心既人...不過我地自己人出黎食飯,好少會論及一d具爭議性既比較題目...

或者咁睇,每個人既終點,各有不同,每個人選擇既path亦都唔同...人生競賽,唔係只得田徑一個項目,可能AK係單車選手,你玩緊既係滑浪風帆...唔通咁都有得比...

所以,比黎都無謂...

on dog 提到...

"要鬥,不如鬥邊個最開心好過啦!"

開心, 亦要define一下, 每個人又不一樣, 唔好鬥鬥下變左鬥"最多錢=最開心"!

C.M. 提到...

香水姐姐:

咁你夠唔夠膽同小弟鬥鬥邊個最開心丫?Definition自己定。

(誠如AK兄講,一提到事業,男人講野就識得就住就住)

渣估 提到...

係嫁。

我都間中羡慕打工仔少我好多煩惱。做老闆壓力可以好大, 尤其後日又要出糧喇, cash flow 差d 都死人。

阿 Sam 你已經都做到 department head 或者在你個環頭兩三人以下、幾十人之上。 經驗比勤力重要, 記得持盈保泰, 唔好太搏殺喇...

開心就梗係要啦! 至於朋友既野, keep 到就keep, keep 唔到就要搵過批新既, 無謂死頂了, 亦不需要為朋友變了而心太煩, 因為, 可能在朋友眼中, 自己都已經變左好多。

十年如一日至可怕啊...

C.D 提到...

鬥最開心!
好呀好呀!

我實嬴架!
識到你地,
都經已夠開心啦 ^.~

D.

匿名 提到...

「幾多至夠?」

用錢買自由?我唔覺得有經濟能力唔使做野=自由 bor! d 乞兒日日都自由la。

我意思係安全感wor!

lee 樣就人人都唔同!

單身o既同有家室o既就已經好唔同!

王老五

Samsara 提到...

AK哥哥:好強爭勝其實都唔係太大問題,只係唔應該用一兩個criteria來睇人,咁人生係好立體既,有好多層面.

On Dog哥哥:我仲以為錢=/=開心係常識添.

CM哥哥:開心應該等於你有幾肯比自己開心,依個definition得唔得?

渣老闆:我係夾心三文治.咁人人都有野煩嫁啦.朋友真係好值得珍惜既.

阿d:真係既?識到你,我都好開心嫁.

王老五:我講既錢買自由,係指吾駛等錢開飯所以可以選擇工作.錢在一定程序上係可以帶來安全感,但係仲有好多野令人覺得吾安全...我之前都寫過下.

C.M. 提到...

個definition好掂!就用呢個喇!