2007年7月7日 星期六

《清明上河圖》

依幅北宋未年由宮廷畫師張擇端所畫既《清明上河圖》來左香港,機會難逢,作為一個閒人當然要去睇下。

其實古人睇卷軸畫,係唔會一下子攤開晒來睇既。佢地會三五知己相約,將畫軸由右拉出兩三尺,慢慢欣賞品評,然後卷返起依一部份,再拉出後面既兩三尺畫出來睇。一卷畫,分分鍾睇一個下晝。咁樣既品畫方式係卷軸畫獨有,又因為有動畫既效果,所以卷軸晝可以帶領觀者用畫家既雙眼一齊去遊山玩水,一齊越時空,看盡古往今來既人事物。而《清明上河圖》呢,就帶我地由鄉既山水田野,穿過汴河,走入當時大宋首都繁華既汴京街道。

北宋未年既汴京街道人來人往、店舖林立。估下乜野係「上店」?又乜野係「飲子」?依個招牌真搞笑,叫「久住王員外家」。

汴河上面條橋就犀飛利囉,叫虹橋,因為好似彩虹咁,由岸東橫跨到岸西,下面一條橋墩都無。我地講緊一千年前喎,起到條咁樣既橋,都真係工程既一大成就。無橋墩有乜野好處?咁條虹橋咪唔會好似九江大橋咁比船撞斷囉,就算船長無洽眼訓,果時又無雷達又無GPS,遇上潮漲大霧,有橋墩既話真係分分搞到橋毁船沈人亡嫁!

講到北宋未年,就一定唔可以唔講俗稱「陰公二宗」之一既宋徽宗趙佶啦。佢既管理技巧就九流,但係做藝術家就一等一,品味一流。同《清明上河圖》一齊來香港既國之重寶展覽之中,就有一幅宋徽宗既石圖。

金銀寶玉器都話好容易明白佢既珍貴同美麗姐,但係去到玩賞石頭---太湖石呢,其實都真係幾難明。雖然太湖石形狀好特別,但係依d沈在太湖底既灰白色石頭,又有乜咁靚,令所有大戶人家都要有一大舊擺在自己個庭園之中,搞到大湖石差唔多比人打撈哂呢?真係唔識欣賞,總之好高層次囉。

宋徽宗仲巴閉到自創瘦金書體,在書法中自成一家添,都真係好厲害。瘦金體就前後重、中間瘦,十足火鸛對腳咁,一節節。我阿媽就唔多鍾意依種字,不過我覺得還好---如果係女人寫出來既話。

唉,趙佶真係錯生帝皇家,又或唔比佢做皇帝,一世做小王子咪幾好,可以日日吟詩作對,風花雪月。換過一個勤力d有心機d既人做皇帝,宋室既歷史會唔會改寫?會唔會就無左金兵入關、靖康之難、精忠報國、十二面金牌呢?咁就輪唔到趙構依個小子做皇帝,而秦檜兩公婆亦唔會食死貓,在岳飛廟內跪到依家。丫,但係咁咪連油炸鬼同射英雄傳都無埋囉?...我又問埋d假設性問題,不過如果我地係多元時空,歷史都可以做實驗既話,咁就好玩囉!

睇完國之重寶畫展,睇埋《清明上河圖》歷史文化背景介紹,再排左好耐隊先可以睇《清明上河圖》真跡五分鍾,咁值唔值得?

去展覽真係只為果五分鐘咩?由睇到廣告,到約人去睇,再睇其他平時絶對唔識亦唔會留意既中國畫,到排隊時既期待,到終於睇到真跡時既緊張興奮,再收到迷你《清明上河圖》做紀念品,返屋企再睇一次,到今朝寫埋篇文,到依家打埋出來,依個先係全部既《清明上河圖》之旅。

在藝術館狹窄既環迴玻璃窗望出去香港島既景色,咦,咪就係一副卷軸畫?張擇端畫《清明上河圖》時,一定誓估唔到生氣勃勃既汴京係不足五十年內會戰火屠城。唔知一千年後,依個被譽為世界三大夜景既維多利亞港景色,會唔會成為未來藝術館既展品?可能d睇晝(相?)既人會硏究我地係幾咁車水馬龍,d人又從事d乜野職業呢!

定係我地都只不過係同一班人,在大千世界中兜兜轉轉?嘿,我會唔會就係「劉家上色檀揀」既果個掌櫃呢?

3 則留言:

火鶴 提到...

哎吔sara, 我係極之想睇「清明上河圖」架.

seikomatic 提到...

sam 師妹,

睇左拿?

俺無排隊所以無緣,亦不覺可惜,怪?

睇清明仲可以留意下D非洲黑奴,赤足村婦..

Samsara 提到...

火大俠:三星堆都好好睇呀,我之前去四川睇過。好神奇,點解古蜀d雕塑會似非洲同瑪雅人呢?我仲買左個銅面具既風玲,而家佢仲係度叮緊。

大師:我又睇唔到咁仔細,乜有黑奴咁犀利咩?村婦見郅但係無留意完來赤足。今日打書釘睇左趙廣超既清明上河圖,真係好有趣呀。真係佩服依種用畫講故仔既功夫。