2008年1月21日 星期一

一日江戶人

我一直只知道江戶係古代日本既一個時期,但原來江戶仲係一個城巿,就係依家既東京。 依本【一日江戶人】係漫畫同文字既結合,1988年出版,到依家重印 左28次!!!...仲要繼續賣緊,真係經典中既經典。

依本書對江戶人既衣食住行無所一包,有游江戶既最佳路線,以前最興既髮型,由武士到賣藥郎中既各行各業...仲有最愛洗澡既日本 人日日都會去既...澡堂。原來以前江戶既澡堂係混浴既...你無諗錯,即係男女共用一個澡堂。 唔駛流鼻血住,無想像之中咁香艷啦。澡堂入面無燈,一片漆黑,蒸氣繚繞,只可以勉強辨別人形。如果唔小心碰到大婶,咁就一定會一盆冷水照頭淋,再加一大輪臭罵 ...而年輕既姑娘呢,都有媽媽姑姐保護得密不透風,根本埋唔到身,甚至望一眼都分分鐘比人鬧。個情形就好似繁忙時間搭地鐵,唔 想比人話係色狼就最好舉高雙手作投降狀...而且要知道當年人人守望相助,唔似依家人際關係咁冷漠,非禮小姐分分鍾比人圍摳.. .所以人人在澡堂都洗得戰戰兢兢。


江戶時期是由德川家康開創,佢做左江戶幕府將軍之後,就脅天子以令諸侯,控制天皇而獨攔獨攬大權,將軍成為實際既統治者。小妹有一事不明,咁一休係咪江戶時嫁呢?佢本來好似係王子喎,又,當時個將軍叫祝利義滿...乜唔係應該姓德川咩?)

哇,做將軍咪既係做皇帝,咁將軍實係過得好奢侈豪華、隨心所欲嫁啦。

唔係喎。

將軍全年無休,無星期日、無公眾假期,亦都無得去大衛營渡假,日日都要六點鐘起身。早餐同午飯都係...唔係講笑...兩餸一湯,真係嫁,而且D餸係梅干、煮豆、燒醬之類,無錯,兩餐都係齋。而且將軍唔可以偏,食如果食剩任何野,太醫就會跳內來把脈...又或者煮飯既人會比人鬧。 夜晚果餐如果唔係忌日既話,就除左梅呀豆呀依d之外,再加煮品同燒魚,有成四個餸咁多,仲可以飲下酒。但問題係將軍有咁多祖先,一個月有成大半個月都係忌日,要齋戒...無魚無肉無酒。

將軍一日既工作,包括要讀四書五經、詩詞歌賦、處理政務、練武、游水...先生仲會比功課將軍做,做唔晒?唔該食完晚飯開OT...無論幾點訓,第朝都係六點起身。 我地都係去片,睇下將軍辛勞的一天:

唔知係咪辛苦得滯,將軍既平均壽命只有49歲... 同場加映,將軍的飯餸是如何做成的:

18 則留言:

seikomatic 提到...

(系澡堂里面)...唔 想比人話係色狼就最好舉高雙手作投降狀....

咁咪好蝕底。

Derek 提到...

應該係足利義滿,室町幕府第三代將軍。十四世紀人物,德川家康係十六世紀,差左百幾年。足利義滿時代應該未有江戶城。

匿名 提到...

大師:我諗美男都有爸爸叔伯保護既...

Derek哥哥:吓,你係講江戶時代之前都試過有將軍脅逼天皇嫁...我對日本歷史就一d都唔知,不過你講起又係喎,金閣寺係足利義滿修建,在京都而唔係東京。

匿名 提到...

日本歷史 ^^" 靠打機同睇漫畫學番嚟

日本擁有全世界最長夠嘅"皇朝", 不過天皇係無權嘅, 有權嘅係大將軍, 呢個情況由鐮倉時代(有玩過源氏,或者睇過源氏物語就好孰啦)至江戶時代(有打過以戰國為背景嘅game就好熟啦), 到明治維新而終結 (如果有睇浪客劍心就應該對維新好熟識啦)

一休嘅時代呢, 應該係室町初期. 當時天皇相重掌權力之類, ko咗北條家, 南北出現兩個天皇對峙, 最後足利家得天下, 建立室町. 仲有唔記得咗係邊到睇番嚟嘅, 歷史上嘅一休係一個破戒僧 (可能由神童變成破戒僧都唔一定呢個我就唔知啦)

提到...

仲有一休個王子位係掛名嘅 (呢個一休入面有提過架) 佢媽唔係皇后

Samsara 提到...

癲狗弟弟:Well,我唔打機嫁,漫畫我就睇好多,不過無本係有歷史背景嫁喎。
>>最長既皇朝...你係係依家既菊花皇朝?我真係要揾本書來睇下囉。

Wilson哥哥:一休阿媽佢唔係皇后...係二奶?...咁一休唔係太子都算皇子掛,我好鍾意睇一休囉,佢d計仔咁多。

匿名 提到...

冇錯,菊花皇朝就係日本由古至今的唯一「皇朝」,傳說中第一代天皇神武天皇係天照大神(類似中國的黃帝)的後嗣,一直到而家GE平成天皇都係同一個血緣

所以被稱為「萬世一系」

Samsara 提到...

匿名君:

萬世一系依個keyword好得,google到依篇:
http://www.singtaonet.com/weekly/weekly0609/weekly0609_4/t20060906_322782.html

天皇同神合一,放在廿一世紀,哈哈,真係荒謬!

Clay 提到...

-日本既僧人好多都係得個名,其實荒淫無道,有好大量仲好似美國啲牧師咁鍾意同性戀同孌童。

-天皇係鐮倉幕府時代開始就無實權,大權旁落至征夷大將軍(亦既係幕府領袖)手上。夷,蝦夷也,亦即係北海道,當時未係日本領域。

-如果話將軍年齡平均得49歲,我覺得仲算高左。足利家自從義滿之後既將軍大部分都係磨碌,大權而經再旁落到大名(亦即係封建領主)手上。有幾個志大才疏既將軍想復興幕府反而落得慘淡收場。當將軍其實係高危職業。

-柳生流劍法係足利幕府後期先有,尾二既將軍義輝都係劍道名家,同柳生流師承同源。

-嗯,雖然話室町係姓足利江戶姓德川,但鐮倉就搞笑啲,去度第二代已經被姓北條既搶左個將軍黎做。

Samsara 提到...

余哥哥:多謝指教!!!日本既歷史真係有趣,一個由盤古初開到依家既皇朝,加上n個脅天子以令諸侯...其實同中國既改朝換代都幾似既。

又,請問有冇D簡易係日本歷史書介紹比我睇呢?

Derek 提到...

香港男仔學日本史同學三國志一樣,十個裏面九個基本上都係唔駛學架,打打下機自然就會識,一路打,打到有興趣既環節先再自己慢慢上網學咁。

不過呢個方法好似唔多o岩你啵...

Samsara 提到...

Oh Derek哥哥,打機就真係no thanks。

三國志都仲有少少(只係少少)用腦呀,前幾日Support哥哥來我office整機,佢話拉傷背脊,咁我就既刻幫佢推椅比佢放低個背囊啦,佢成日都要揹好重野,好容易拉親...結果佢話係因為玩Wii...佢「跑步」打破左世界記錄所以搞成咁...既刻遭受到成個Office女仔既白眼...Support哥哥好enjoy依d attention。

Clay 提到...

嗯,若虛既日本史知識都係到處涉獵返來,好多野其實都係一知半解。脅天子而令諸侯呢,三個幕府幾百年都係咁架,直至明治天皇先重奪實權(即係明治維新個個呢)。

日本史既書,若虛有睇過兩三本,但都無買,唔係好記得名喇。不過,大部分書店日本史書唔多,而又以近代史佔大多數,通史既書無幾本,你可以逐本睇幾頁睇下好唔好睇都可以呀!大部分都唔會太深入的。

p.s. 應該係我稱呼你samsara姐姐才對!

匿名 提到...

其實wilson就係我啦... 我個死人gmail自動log in我冇留意

一休媽? 算係嘅, 如果唔係私生我諗佢唔洗出家走佬

柳生流方面我就好熟, 我係山田風太郎小說fans嚟架! 柳生流指柳生新陰流, 新陰流有好幾個流派, 但柳生流先係嫡流. 當時柳生當家 - 柳生宗嚴拜上泉信綱為師, 得師賜名"石舟齋", 後來上泉再次拜訪柳生領地, 給予"無刀取"嘅考驗, 啫係空手入白刃 當然柳生宗嚴成功咗 (無刀取呢段故好出名架!! 不過嗰陣時佢應該叫新左衛門)

ps... 有歷史背景又啱女姓睇嘅漫畫... 好少喎, 甲賀忍法帖囉, 山田風太郎原著的, 劇情太概係, romeo&juliet嘅忍者version (不過睇漫畫不如睇番小說啦, sogo頂樓有中文版賣呀)

匿名 提到...

有關鐮倉源家同北條家... 我覺得係源家自己攞嚟衰架啫, 趕盡殺絕源義經呢個最有實力嘅人 源家嘅收場算係報應啦 ^^"

Samsara 提到...

若虛弟弟:好都有見到d日本史既鷄精書呀!雖然日本話自己好受中國文化影響,但係佢地其實都同我地好唔同,睇下佢既歷史應該易明d。

癲狗弟弟:柳生流依個名十分搞笑呀,如果我唔係在依本都幾正經既書見到個名,一定會以為係老作出來既武俠小說功夫...甲賀忍法帖係書名來嫁?真係有毋賀派嫁...又,北條呢,我只識北條司咋。

匿名 提到...

佢地有個支流個名更勁, 叫柳生心眼流! 呢個流派仲存在架, 你絕對可以去學! 然後同人講你係柳生流嘅門人, 成個女俠咁!! XD

噢, 係呀係書名嚟, 日本嘅武俠小說. err, 甲賀同伊賀係地名, "流", 啫係嗰到流傳嘅忍術, 甲賀市同伊賀市都現在都存在架!! 佢地嘅事史書都有記載, 最大鑊係天正伊賀之亂 (又係打機學嘅), 記載其實唔多, 所以被人係小說寫到天花龍鳳哈哈!

唔通你係北條司漫畫漫fans!? 鐮倉嘅北條係d名門望族咁囉, 應該係政變之類上位嘅.

Samsara 提到...

癲狗弟弟:我打得就真係有鬼,但係日本d名真搞笑...我以前中學有個同學移民,交比我既任務就係要期期City Hunter都要買來寄比佢,所以孟波我係睇晒既...我都有睇少年漫畫嫁,只要佢d畫唔好太醜,由古時既IQ博士、龍珠、Slam Dunk,到金田一,死亡筆記都有睇。