2008年1月28日 星期一

春運

在正農曆年前既春運高峰時發生五十年不遇既雨雪風暴,令到南北陸運中斷,真係民工既天大壞消息。

依d民工離鄉別井去到廣東打工,做一d辛苦沉悶低技術既工作,為既都係賺多兩個錢,在過年時可以帶多d錢同禮物返鄉下,可以一家人團聚,好好敍舊同休息一下。中國人要回家團年的習俗牢不可破,依家有幾十萬人在天寒地涷之下滯留在廣東、江蘇一帶,饑寒交迫,又要不停落雨,又有家歸不得,最慘係仲有人帶著小朋友一齊返鄉下,小朋友咁樣涷法,點算?

唔係窮、唔係住得偏差都唔會搭火車啦,佢地既抗災能力偏低,買唔起機票,飛機亦唔見得去到佢鄉下,本來已經迫爆既春運再加上依次天災,真係去到災難級!

其實春運既問題從來無解決過,火車客車全部迫爆,好多人要連座位都無,要企足十幾廿個鍾,不過,佢地都唔介意,只要迫到上火車就已經好開心,前兩個禮拜仲有個女學生因為太迫比人推落火車而被輾死既慘事。只不過因為年年都係咁,香港傳媒報導少左。

依次天災更加突顯左問題既嚴重性,雖然上海有時速高達430公里既磁浮列車,仲起緊一條高速鐵路,去北京只需要五個鍾,但係,依d高速列車只集中在大城市,二三線城市甚至山區仍然都係用緊又慢班次又疏既舊火車,佢地先係最需要平價火車既人,如果交通唔搞好,佢地點同世界接軌?點發展?

今次睇新聞既片段,令我諗起n年前華東水災香港既一首賑災歌:「滔滔裏,假使一個是我,問我怎麼過?」

係時間正視同徹底解決春運既問題啦。

15 則留言:

seikomatic 提到...

人間煉獄.........

匿名 提到...

對, 民工長期向外邊打工, 有時幾年都無得返家鄉, 有得返就算企十幾個鐘火車, 再十幾個鐘車路都唔會減少佢地歸家過春節心情, 以前有大陸工友好興奮同我講終於可以返鄉下過節, 而且仲有九日假期添, 我不為意問路程多遠, 佢就講, 兩日坐火車轉火車轉公車, 來回四日, 咁..即係得返五日向家鄉過節..@_@

祝姐姐新年快樂! 身體健康 ! 萬事如意 ! 恭喜發財 !

hitcake

Samsara 提到...

大師:天哪,湖南湖北仲有好多人無水無電添呀。

打餅妹妹:我有個客話佢開左Bombay office,因為中國工資越來越「貴」...我唔知比起印度我地係咪可以慶幸呢?印度火車日日都迫到d人要爬在車上面,日日都跌死人...我唔係要共產,但係可唔可以咪咁樣朱門酒肉臭,路有涷死骨呢?

新年快樂呀!今年有冇得去下China Town食下中國餐呢?

匿名 提到...

姐姐,
你話"我有個客話佢開左Bombay office,因為中國工資越來越「貴」..." <---我有好大感觸呀, 話說我家母后向宣明會助養左一個貴州小朋友幾年, 有一日宣明會打電話來叫母后唔洗再助養啦, 因為人家環境比以前大好, 走左去讀寄宿了, 中國人越來越富有了...
我家族好大的, 年年新年我都係指揮賓妹同落手落腳招呼客人果個, 今年實在想平平淡淡咁過了. 而且年年收利是都比人寸, d 說話一年克溥過一年, 今年不知幾開心可以避難呢 !!
我想...今年應該是人生中最快樂既一年...要好好珍惜了..

hitcake

匿名 提到...

SAM,

春運固然是中央的一個老問題,但今次再加上綿綿寒雪南下才是大危機!!!(是次下雪區域己有50年未發生過類似的情況。)

有好多交通(機場、鐵路、高速公路)及電力設施,因寒雪而關閉或維修,加上受災區仲會有好多是比較窮的農村。斷電斷糧,交通受阻,就算你想支援(中國紅十字會已在安排救援工作)都無法到那兒。

望天打救他們的
麥太

P.S.明天出TRIP小心航機誤點,記得穿羽絨呀!

ak 提到...

Samsara姐姐,

春運是「讓一部份人先富起來」的結果...

中國是一個最喜歡做「運動」的國家...所以,「奧運在中國」...

學 霖 山 莊 提到...

剛剛電台話有關當局在攪「清糞」問題...

看來「拉蓮娜」不獨只攪美帝...

Samsara 提到...

妹妹:不容否認既係,中國自從改革開放以來,真係富裕左,但係貧富不均得好緊要,依個都係會引致社會動盪既好大因素,不患貧,患不均...涷就不如買電毯啦,暖氣會搞到皮膚好乾,周身痕嫁!

麥太:我終於都等到你啦!頭先丁丁打電話來,話上海又開始落雪,地下一多冰都怕既會delay flight...我依個雨女,都係一定會撞正雨雪嫁啦。我今次雪褸雪帽都帶齊,如果唔係驚有人當我打劫銀行,真係連臉罩都會戴。

祝我好運啦,希望我架飛機唔會跌落來,行路唔會跌低,在寒氣中載到的士,請到人,返到來...好想打邊爐呀我!

AK哥哥:中國係依幾廿年前多運動姐,之前好正常嫁嘛。

學霖哥哥:不過今次政府既應變都算係咁,温總仲出來say sorry,廣州火車重開d人咁博命地跑入去都無出現人踩人...都係不幸中之大幸囉。

但係最緊要係痛定思痛,要諗點樣加強抗災能力,搞好能源供應同交通網。

seikomatic 提到...

咦~俺又明天開始北平三日遊。咱們只是相隔幾百里。

Samsara 提到...

大師:北平仲涷...Good luck!

Barry 提到...

Samsara師姐,

發覺書櫃原來有兩本Why worry: How to live without fear and worry,你有興趣要一本嗎?或你知道有朋友、同學想要,可電郵到barrywcng@gmail.com給我,等下次上《法句經》堂時給你,謝謝!

Barry

ondog 提到...

苦了眾生...

新post中借了sam姐一文一用, 見諒見諒! (請妳飲早茶!)

余若虛 提到...

睇張立,知道兩湖一帶既屋係唔防寒既,極通風!都唔知佢地點捱,唉!

Samsara 提到...

On Dog:好野!果篇文呢,係在我都幾緊張時收到,覺得完全係及時雨,就係寫比我睇既。

余哥哥:火車環境之差,令我忍唔住諗起送猶太人入集中營既列車,佢地會唔會心理創傷嫁?

湖南湖北其實天氣都幾涷,都係錢作怪,幾時依d貧窮省份(要加埋貴州)入面最窮既人先可以有dd小康呢?

Samsara 提到...

Barry師兄:依本書我都有兩本,一本中文一本英文,我攞時唔知係同一本...好鍾意佢入前個「巴士」比喻來解釋無我。

我有排都上唔到堂呀,多謝師兄費心寫下法師既課堂解說,獲益良多。