歸

香港去上海，只係遲左一個小時，心諗好彩．．．但係返來就大件事。

上海晴天左廿四小時，跟住由星期五中午開始一直落雪，星期六都一直無停，下午一點去到機場，人多到水洩不通，連車仔都揾唔到一架，座位就更加無。據說大雪涷到停在上海機塲既飛機機翼都結冰，解涷需時，機塲唔夠停機坪比飛機降落，所以上海機場根本唔比香港既機起飛。港龍到三點只飛左三架機，其他全部都delay，連check-in都唔比，亦唔知幾時可以飛．．．連十一點機既人都在度等check-in，我搭三點四機既，只有等。

結果，我在機場等到六點開始check-in，入到侯機室，一直等到夜晚十二點先上到機，返到香港已經深夜兩點半．．．足足遲左十個鍾。

其實我已經好好彩，我前面有幾架機被取消，我之後既所有港龍機都取消，機位一比人取消就只有等消息，天公不造美既話，真係唔知幾時返到來。雖然滯留左咁多人在機場，都只係零星地有既人同地勤人員理論，但係氣氛都尚算平和，無人大哭大鬧，無人在機場示威拉banner。碰到既香港人都係同一句：「等唔緊要，返到香港就得嫁啦！」

連日既新聞報導，令大家都好清楚今次既天氣反常災情嚴重，比起在廣東車站被踩死民工，比起因為等太多日同火車太擠迫而產生幻覺跳車既夫婦，比起湖南在暴風雪下已經停水停電九日既災民，我地依班在機場等候，有暖氣、有水飲、有飯食、仲有乾淨toilet既人，真係排隊要抱怨既話，真係點都輪唔到我地，只可以隨遇而安，但係一諗到萬一風雪唔停，可以搞到返唔到香港過年．．．我真係有ｄ明白民工思鄉既心情，我只係離家幾日姐，佢地一年先可以返屋企一次，家中有父母，甚至有自己既兒女，仲有一大班親朋戚友同埋熟悉既環境，能不歸心似箭嗎？

中國講什麼大國掘起？起什麼好大喜功既磁浮列車？可唔可以搞好基礎民生建設，改善交通鐵路同鄉村道路，改善電網開發再生能源造好節能同減低環境污染呢？今次胡錦濤去油田礦坑激勵士粂，温家寶四出去到重災區指揮救災兼向全國人民道歉，依ｄ都係非常負責同有承擔既做法，連雙大巨頭都親身出動，下面全地官員亦都一定會上行下效，加把勁去救災，依個就叫Leadership。

但係雷鋒式口號同救災熱情只可以燃燒一陳子，熱情冷卻之後就無以為繼，而且長貧難顧，今次受災最嚴重既湖南、湖北、貴州地區，始終係要自己諗辦法長遠解決問題。ｎ年前既華東大範圍水災，歸根究底，發現係因為長江一帶樹木過度砍伐，一有大雨時無左樹林吸水同抓起泥土，引致全國南部大水災，中國政府痛定思痛，重新植林同嚴厲打擊非法伐林，咁先無話再來一次更大既水災。

這次暴風雪過後，政府真係要learn the lesson吧！下年春運仲係咁既話，真係點對得住咁多人民？