2008年2月3日 星期日

香港去上海,只係遲左一個小時,心諗好彩...但係返來就大件事。

上海晴天左廿四小時,跟住由星期五中午開始一直落雪,星期六都一直無停,下午一點去到機場,人多到水洩不通,連車仔都揾唔到一架,座位就更加無。據說大雪涷到停在上海機塲既飛機機翼都結冰,解涷需時,機塲唔夠停機坪比飛機降落,所以上海機場根本唔比香港既機起飛。港龍到三點只飛左三架機,其他全部都delay,連check-in都唔比,亦唔知幾時可以飛...連十一點機既人都在度等check-in,我搭三點四機既,只有等。

結果,我在機場等到六點開始check-in,入到侯機室,一直等到夜晚十二點先上到機,返到香港已經深夜兩點半...足足遲左十個鍾。

其實我已經好好彩,我前面有幾架機被取消,我之後既所有港龍機都取消,機位一比人取消就只有等消息,天公不造美既話,真係唔知幾時返到來。雖然滯留左咁多人在機場,都只係零星地有既人同地勤人員理論,但係氣氛都尚算平和,無人大哭大鬧,無人在機場示威拉banner。碰到既香港人都係同一句:「等唔緊要,返到香港就得嫁啦!」

連日既新聞報導,令大家都好清楚今次既天氣反常災情嚴重,比起在廣東車站被踩死民工,比起因為等太多日同火車太擠迫而產生幻覺跳車既夫婦,比起湖南在暴風雪下已經停水停電九日既災民,我地依班在機場等候,有暖氣、有水飲、有飯食、仲有乾淨toilet既人,真係排隊要抱怨既話,真係點都輪唔到我地,只可以隨遇而安,但係一諗到萬一風雪唔停,可以搞到返唔到香港過年...我真係有d明白民工思鄉既心情,我只係離家幾日姐,佢地一年先可以返屋企一次,家中有父母,甚至有自己既兒女,仲有一大班親朋戚友同埋熟悉既環境,能不歸心似箭嗎?

中國講什麼大國掘起?起什麼好大喜功既磁浮列車?可唔可以搞好基礎民生建設,改善交通鐵路同鄉村道路,改善電網開發再生能源造好節能同減低環境污染呢?今次胡錦濤去油田礦坑激勵士粂,温家寶四出去到重災區指揮救災兼向全國人民道歉,依d都係非常負責同有承擔既做法,連雙大巨頭都親身出動,下面全地官員亦都一定會上行下效,加把勁去救災,依個就叫Leadership。

但係雷鋒式口號同救災熱情只可以燃燒一陳子,熱情冷卻之後就無以為繼,而且長貧難顧,今次受災最嚴重既湖南、湖北、貴州地區,始終係要自己諗辦法長遠解決問題。n年前既華東大範圍水災,歸根究底,發現係因為長江一帶樹木過度砍伐,一有大雨時無左樹林吸水同抓起泥土,引致全國南部大水災,中國政府痛定思痛,重新植林同嚴厲打擊非法伐林,咁先無話再來一次更大既水災。

這次暴風雪過後,政府真係要learn the lesson吧!下年春運仲係咁既話,真係點對得住咁多人民?

6 則留言:

匿名 提到...

Sam,

好開心你回港及可以多看事情的一面。

有好多時,要出現問題,回看整件事才知道從前的錯。

希望今次災難(到現時為止,中央還未定為雪災)的捐失(人命及經濟活動)可以降到最低。

怕冷的
麥太

*今次重唔威番一次,我係第一個留言者。唔好話我成日唔上你個blog!

s-pig 提到...

返左黎就好啦...
預祝你鼠年行大運!!

匿名 提到...

咁你等嗰幾個鐘真係齋等!?!?
嗯~ 我覺得其實都唔係大好喜功嘅, 個磁浮車係我地自己開發嘅, 放錢落科技, 總好過香港全部錢去哂金融! (啫係, 我成日覺得我讀完大學返到香港要乞食!!)
又喎, 我覺得爆啲咁嘅大鑊嘢, 官場應該會執下位 (不過報紙睇唔到, 無法證實) 但係執完位之後係咪會痛改前非呢? 難講!
而且, 我都覺得兩大頭係做show多啲...雖然, show, 係要做嘅...

Samsara 提到...

麥太:叻呀今次,等我聽日出個pop quiz比你先,嘿。

s-pig妹妹:去到,返到來,仲請到一個人,好明顯我行運一條龍啦,都祝你身體健康,新年快樂!

癲狗弟弟:我早有準備,帶住兩本書,一本睇晒,第二本都睇左兩個chapter,如果繼續飛落去,我一年唔只會睇五十本書囉。

我define兩巨頭果d係必要之show,中國太大,由古至今都係中央有中央講,地方有地方做,所以示範好重要...但係激情過後仲有解決問題既決心同韌力,才是王道。

seikomatic 提到...

師妹,

番泥就好啦。

俺距你幾百里則長空無雲,普選陽光,氣通人和。

有時覺得共產國家機器都幾 WORK:政府話要停止煤油出口,保證電廠發電,暫准有問題煤礦繼續生產同死人,又唔准生活電、柴、米、油加價,坦克車出埋去碎冰(雖然遲就遲D,但系真系唔想咁輕易就出皇牌),深深感受到黨的力度,靈活性同變通能力!唔通仲等樂施會,東華三院籌款咩。

講泥奇怪,李連杰個壹元基金,捐左九十幾萬去振災就話系成立以來最大規模捐款?唔系個會真系咁Un定系李生自已都無乜號召力同貢獻??

ps 總理一樣同你滯留機場要轉座火車。

Samsara 提到...

大師:係啦,你d相全部都係萬里長空,我就落雪落到呀。

我都覺得d解放軍就真係應該走去救災,唔好一日到黑殺人放火,做返d有建設性既野;坦克車原來陣壓手無寸鐵既人民之外都仲有其他用途,真係應該早d用,我最初仲以為唔出坦克係因為坦克會破壞鐵路同馬路添。

李連杰之前好似都損過錢比地震災民,不過唔知幾錢。

哈哈,聽到總理都滯留,又真係令我舒服d喎,希望風雪快快過去。