2008年4月4日 星期五

崑曲表演---湯顯祖

介紹及購票


有進念既加入,希望係會令部劇易睇左而唔係仲難明啦,崑曲,真係好靚好聽好優雅嫁。


湯顯祖係邊個?佢既來頭就勁囉,係明萬曆年間既進士,因為佢個人實在太正直啦,唔肯埋堆又夠膽犯顏直諫,一生仕途坎坷,最後頂唔住官場黑暗,四十八歲時放低辭職信就走左,真係正宗既劈炮唔撈,回鄉專心從事自己熱愛既崑曲創作。


佢既代表作,首推牡丹亭,此劇一炮而紅,當時走去睇牡丹亭既盛況,簡直係萬人空巷,湯顯祖可以在自己有生之年能夠見到自己成功,相信都老懷安慰。巧合既係,湯顯祖同莎士比亞係同一年代,仲要係同一年1616年死,究竟湯顯祖係東方既莎士比亞,定莎士比亞係西方既湯顯祖?

湯顯祖雖然失意於世途,但正因為如此,佢可以將所有時間精神用在戲曲創作之中,成就一代大文豪,人生既得失,其實都係絲絲緊扣,一體兩面。想湯顯祖寫牡丹亭時,真正發揮自己既天才,一定會開心過做官時...掛。


湯顯祖份人咁有型反叛,所以牡丹亭個故仔其實十分之咁YEAH同勁爆!話說南宗年間南安太守既女兒杜麗娘有一日在花園中遊玩後睡著,夢中與一名年輕書生柳夢梅在夢中相遇,共墬愛河...哇,依一出牡丹亭之遊園驚夢,講得白d,其實係夢中幽會喎,五百年前講一個咁樣既愛情故事,真夠疆!

個故仔仲好長,真係要睇晒全劇既話要成九個鍾,之前由白先勇策劃既牡丹亭青春版,要分三晚來演。


中央電視台制作左一個八集既記錄片【崑曲六百年】,其中依一集就係講湯顯祖同牡丹亭:







什麼是「如花美眷,似水流年」?請在下面既片由第五分鍾開始看...睇啦睇啦,只要兩分鐘,真係美之極致。




「越優美的東西它越留不住,我們喜歡花,喜歡青春,但是喜歡的是真實的東西,而不是假花和冒充的青春。這些東西我們希望它永遠的美好,但它必須跟着它生命的過程,慢慢地結束。


崑曲,我想它也是這個樣子,我們留不住它,似水流年,像水這樣的過去了,我唱崑曲唱的很投入時,我父親曾很感慨地說:『你們是如花美眷,我呢,只剩下似水流年了。』...等我的學生唱得很好的時候,我也會很感慨很油然地說:『你們是如花美眷,多美呀,我呢,只剩下似水流年了,但是我不悲哀,水會這樣的流過去,藝術會傳下去,崑曲會永遠的美好下去。』」

10 則留言:

Morca 提到...

不覺如花美眷...
只見似水流年...

seikomatic 提到...

第一個感覺,昆曲無論唱、做、手都柔好多,而且身體接觸,唔似粵曲果種拱手,互格就算表示恩愛。

蘇州地緣應該有關系。

呢種綠色文化學習,比死讀書深入好多,香港學校系咪應該用泥做教材呢?

多謝中央 臺,多謝湯生,多謝師妹。

Samsara 提到...

Come on Morca姐姐:「越優美的東西它越留不住,我們喜歡花,喜歡青春,但是喜歡的是真實的東西,而不是假花和冒充的青春...這些東西我們希望它永遠的美好,但它必須跟着它生命的過程,慢慢地結束。崑曲,我想它也是這個樣子,我們留不住它,似水流年,像水這樣的過去了,我唱崑曲唱的很投入時,我父親曾很感慨地說,你們是如花美眷,我呢,只剩下似水流年了。...等我的學生唱得很好的時候,我也會很感慨很油然地說,你們是如花美眷,多美呀,我呢,只剩下似水流年了,但是我不悲哀,氶會這樣的流過去,藝術會傳下去,崑曲會永遠的美好下去。」

又,如水依山隨緣自能安然入海,共勉!

大師:唔多清楚,我聽話以前唱崑曲同京劇都係男人,所以梅芳要身為男人唱貴妃醉酒,之前在民初有一批「傳」字軰既崑曲伶人,全部都係男人,我估因為咁,有身體接觸都可以接受...但係又見到有文人會組織自己既妻妾唱崑曲甚至組戲班表演喎...都有d混亂...

講起性別疑惑,我都係任劍輝過身時,先知道佢原來係女人!!!!驚爆程度真係9.9。

Morca 提到...

24 - 27 /4...

Samsara 提到...

好驚呀!!!我在上海竟然上到Blogspot呀!!!!

匿名 提到...

Sam:

恭喜恭喜!
咁你唔好再有藉口唔寫網誌啦!

期待你的文章
麥太

Samsara 提到...

麥太:我在上海係大腦閉塞既...不如你寫啦,好唔好好唔好好唔好好唔好?

匿名 提到...

Sam:

多寫多想多留意身邊的事物,可能會提醒你乏略的看法,亦可鬆馳吓身心。或可令他人有得着呢!?

若我要寫/發表文章,我會開個網誌。多謝關心。(你的心意己全收到!)

等看文章的
麥太

Samsara 提到...

麥太:

Ok,我認,我真係雨女。

昨日上海橫風橫雨,好似打風咁,去食午餐時涷到打冷陣,一鞋都係泥水。

到夜晚d風係由地下吹上來,我把傘反左幾次...又,依把在大板幾廿蚊買返來既傘又出奇地堅固,咁都無事...之後仲不停地打雷。

今日先知道,昨日大中國範圍地區落冰雹,上海仲有兩個人比雷劈...

依家外面仲有呼呼風聲,又係天氣反常?

匿名 提到...

sam:

你不如變身成神袐人出街,即係買件乾濕褸/雨褸加水鞋着。對腳濕足成日好唔舒服又易病。(阿媽又上身了!)

至於雷同雹呢,你自己小心點,你知你有幾多人"愛"你啦!:>

你個wan應該掂咗啦,都上得網誌。有冇留意"聖火"新聞,同d網民反應呀!又擦新咗好多世界紀錄啦!呢次仲唔"威"!?

口痕的
麥太