2008年5月4日 星期日

立立雜雜

睇左Iron Man,得喎,好刺激。之前睇poster已經覺得依個唔係超人果類既英雄片,因為個大俠個樣唔只唔正氣,仲似反派吸血資本家多d...又真係咁囉,節奏快,劇情都算合理,仲有好未來既科技,仲有殺人魔王軍火商Tony Stark既從良心路歷程,幾新鮮,仲會有續集添。

又,潮流興懷舊,睇trailer講到就來會上Indiana Jones!!!! Well,福伯有冇六十歳?佢肥肥地喎,出拳好明顯幾慢下。想當年,我都係Indiana Jones既粉絲來,覺得佢呢,好英。

*********

買左台灣才女吳淡如既新書:
時間管理幸福學的圖像

我呢,其實對d自號女人專家、愛情專家既才女作者十分感冒,不嬲都唔睇,但係吳小姐有d唔同,台灣好似無乜台男台女既爭辯,吳小姐唔單止毫無怨婦氣息,仲超級識得照顧自己同安排生活,正能量充滿。當有人問佢咁忙,點解仲有時間寫作,佢話寫作係佢既興趣,可以用來減壓,仲話自己好似電車打機上癮咁,幾日唔寫唔舒服。有人見佢在做兩個訪問之間既空檔都攞出notebook來寫野,覺得佢既工作精神真係好厲害;吳小姐自己解釋呢,係做訪問需要高度集中精神,好大壓力,寫野令佢開心又放鬆。

經吳小姐一提,我先諗起,其實不過在五個月之前,我係勁鍾意寫野既,覺得寫野本身已經係動力同奬勵,完全唔需要任何外來既鼓勵就已經好開心,仲試過寫神來到時,乾脆揾個位坐低,攞張爛紙出來就寫呢。

點解,咁快,寫作對於我有時會變成交功課甚至係工作呢,我又唔會兼無可能靠枝筆揾食。學吳小姐話齋,管理自己同減肥一樣,唔可以對自己太嚴,又唔可以太鬆。

嗯,明白。

*****
仲有一樣唔記得左既係,吳小姐提倡呢,人要保持活力同心景年青,就要一年學一樣唔同既野。唔同既野唔係話打爆一隻新Game,而係學一d自己從來未試過、甚至自己最唔惦既野。佢自己就身體力行,學左油畫、陶瓷、攝影、佛朗明哥舞(乜來?)、潛水...

我呢,好贊成呀,都學左游水同...(唔準笑)...倉頡。Well,游水係我咁多年來比人恥笑左無數咁多次既野,我中一到中七都有游水堂,全班同學不論男女,只要唔係中六插班生,個個都識游水,大家開開心心玩水時,只有我一個人好辛苦地攞住浮板踢水,仲要戰戰兢兢唔敢去深水既地方,次次考游水都要經歷一次瀕死經驗,仲要默默忍受體育老師既搖頭同白眼,果時,真係有d自卑...所以,我估都估唔到,我已經係第次學游水竟然學識左,真係開心到我死呀,開心到果年由夏天直至冬天都不停游水。冬天喎,就算有暖水池,上水果下都一樣係涷到入骨嫁!果時仲會一游完水就出去泳池外面既粥店,食沙煲上熱辣辣既皮蛋帶子粥添,幸福到流晒鼻水。

今年呢,就唔多順利lu,鬼知巴利文d grammar咁深咩,中間仲要去左上海成個月無上堂,已經完全放棄啦,唉。

******

又,吳小姐對於感情之事,都有佢一套好鬼正能量的睇法,可以揾本來睇睇。吳小姐既書好易睇,兩個鍾頭內可以搞惦。我對上次睇佢既書,係在台北巿到機場果程車中睇完,即刻可以還返比丁丁等佢自己揹返香港...

丁丁,我地幾時再去台北飲飲食食不務正業打書釘姐?

*****

講到愛情觀呢,我地都係受左細個時候睇既愛情小說所影響,我見大部份人都係睇亦舒,都好呀,點都摩登d呀,我呀,仲大鑊,細個時睇既係...真係唔多想承認...瓊瑤....滴汗呀呢!

係還珠格格之前,文藝大悲劇時期既瓊瑤喎!我依家淨係睇佢d書名,什麼「庭院深深」、「卻上心頭」、「一簾幽夢」已經飽晒。更慘係,瓊瑤筆下既女人,永遠都係被命運捉弄楚楚可憐既弱者,就算最後大團圓結局,中間可憐媳婦要肴成婆既過程都係艱辛得賺人熱淚兼波折重重。記得佢有個短篇故仔,講有個比丈夫拋棄既女人一手養大三個女兒,母親因為自己既經歷,教導女兒千萬唔好相信男人,結果,大女因為母親從中作梗而失去至愛,二女因為不安感懷疑自己男友不忠而自殺,三女呢...嗱,全個故仔最反動既內容來啦...好聽阿媽話,只讀書唔拍拖,結果有日突然頭痛欲裂,醫生話佢讀書太多燒壞腦,以後都唔可以用腦喎。

有冇搞錯!瓊瑤阿姨請問依個係乜野病來?其實瓊瑤都唔係老,點解仲封建過張愛玲蘇青?今時今日,瓊瑤果d什麼「悲劇女主角」已經好out嫁啦,睇吳淡如啦!

****

又,我終於都跑返步,仲一連跑左兩日,Yeah!

8 則留言:

Morca 提到...

近期我都睇咗套戲, 叫 "Once",不算太差,但睇完後會喺片後加多兩個字 "is enough".

講到咁正...好想去打書釘...

跑步!!!好~~~

Carole 提到...

瓊瑤 -- 一本都睇唔晒

Yun 提到...

死﹐睇你呢篇﹐一邊睇一邊有好多野想講!!! (唔知記唔記得曬呢。)

吳淡如!! 我好中意架!! 我唔睇乜乜愛情書架﹐但幾年前發現左佢﹐好中意佢既觀點。其實我覺得佢都唔係講愛情既﹐佢講比較多「自我價值」既野囉。香港女孩真係要睇佢囉。

但近年﹐她結婚了。所以寫既野都唔同左。近呢幾本書都開始講多左家庭。但佢早幾年前既書好啱中女睇囉。:P

佛朗明哥舞﹐係Flamingo Dance 呀。西班牙舞﹐好wild架。好似劉德華和吳君如有套戲係講呢隻舞。

游水。。。我地同病相憐呀。我而家都唔識。

好在我從來都冇睇過瓊瑤呀亦舒呀張愛玲呀等等。睇左真係會壞腦架。瓊瑤那些連續劇﹐我好細個睇都頂唔住!!

火鶴 提到...

游水(除咗乾果隻)同倉頡, 我兩樣都唔識,
有乜咁好笑呢?

喂果D肥dudu玉兔包, 响台中影架,
去台北飲飲食食不務正業打書釘, 預埋我.

Samsara 提到...

Morca姐姐:來緊都有幾多好戲睇,仲有獅王女巫衣櫥既續集Prince Caspri睇,吳淡如係可以比到d好實際又即刻可以用到既insight比各女士嫁,我覺得HK90太貴,去青文有七折。

Carole姐姐:好醒目呀你!我既瓊瑤後遺症係,好怕肉麻野。

小雲:
瓊瑤呢,仲有一本書叫做,咳,「我是一片雲」...我是天空裡的一片雲、偶爾投影在你的波心...徐志摩D新詩,哈哈哈哈!

吳淡如呢,真係好識得照顧自己&愛自己,獨立而不逞強,就係依隻。佢呢,勸天下女兒,千萬唔好虐待自己,自己唔開心亦唔好賴晒男人,亦要知道放手,同埋,要睜大眼睛,唔好痴埋Loser度...的是真言!

台灣連續劇呢,真係好嘔,仲絶對有打女人塲面,加埋立法會成日有人摳鬥,所以細個時我對台灣男人毫無好感。玲玲呢,係真係會睇到心都寒,不過佢勁貪靚...得好笑,海派。

游水,well,本小姐已經學識左lu,唔係同病相連嫁啦,哈哈。我學得識係因為碰到個好叻既教練,都唔駛十堂佢已經同我講,你學識左嫁啦,唔好再上堂啦,自己練啦!...係咪型到爆呀!

大俠:我既年代,其實好多人都(被迫學)識打at least速成嫁啦,但係我當年既同房打倉頡仲快過佢寫字,我中文有論文要交,就算幾千字,都係今日掉比佢,佢聽日就交貨,我最多都係請佢食餐canteen飯,仲叫佢做cheap labour,好在同房脾氣好加心地善良,無半夜踢我出去。

台北好好玩嫁,你識唔識有人有誠品discount card姐?

Morca 提到...
作者已經移除這則留言。
Morca 提到...

Chronicles of Narnia!

我都有本 leather bound 嘅 Limited edition.

不過都係得個儲字...

Samsara 提到...

Morca姐姐:那裏亞故事集,係由我小學開始睇既書,真係陪我成長,果時當然係睇中文啦。依個都有一本英文Hardcover,不過,同你一樣,未睇過...