博升職

近排看見有好多書同文章都教人點樣博升職,雖然呢個問題有d古怪,但是我都是忍不往要問,做乜要升職呢?

其實我以前讀書的時候都好有雄心壯志,準備要出來闖一番事業,不過當自己在Career Ladder越爬越高時,就越來越多問自己到底爲乜.有時目標達到時,最多開心幾日，跟住反而會因為一下子没了目標而感到空虛失落.到得到的時候又覺得不外如是.

我舊公司的老闆的老闆同我講的一番話不覺意點醒了我，他一直以我的ｍentor自居，甚至有時我覺得他不會放過任何一個機會同我吹水. 一次做project做到好夜,但是他又好似越夜越精神,不記得傾開d乜嘢,他又開始發偉論,講如何快人一步,理想達到.他舉例說比如你的目標是做CEO,咁你就要先咁,再咁,再咁咁咁... 其實中間的咁咁咁我完全毋聽,因為他第一句"如果你要做CEO"我已經kick住了.我要做CEO來做乜?我連我老闆個位都不想坐!

我老闆份工真是勁辛苦,我成日都懷疑如果不係他有兩個女仲讀緊小學,他又係男人需要一d類似事業的物體,他真是一早就不做.他一個禮拜起碼有兩天要晨早8:00返到公司同美國開會,到California夏天轉翻夏令時間時他仲要7:30開會,都算美國d大佬有少少同情心,肯遲半個鍾開會.如果我聽思哲講要早過老闆返工,就分分鍾要7:00返工先得.

我都有幾次不幸地要開這個會,除了倒塔咁早要起身,生理時鍾大混亂外,仲要忍受一個充滿政治同卸膊的大會,會中各武林高手都傾盡所有太極的修為,有鑊就卸,有功就撲出來認叻.大老細呢都根據自己的喜好同邊個講得似層層來做決定.在咁o既setting下香港這邊真是好輸蝕,不是因為要講英文,會中人人英文了得,而是文化上中國人不慣這種debate,成日爭不到機會講嘢,又成日比人搶咪, 談到半路就被人打斷話柄. 而我老闆就因為他坐的是三刹位,性格上又怕得罪人,所以成日捱打比人屈,雖然他的人皮面具質料上乘，但是有時都睇得出他頂不順的神情.

好啦終於開完會出來,他就要執行開會的決定, 又到我地呢班下屬"詐型",因為好多時候d決定不合理,他成日比我地班女人圍住問到口啞啞,他又不敢發惡,唯有Please先Please後,有時仲慘到要自己做埋,見到他真是好似見到一件超大的公司三文治.

咁我的老闆的老闆又點呢?雖然他貴為VP,又是由大老板(Senior VP)舊馬房帶過來,十分得寵．但是他的壓力大到嘔,看住他由返工以來一直髪線向上退,一有事就要既刻飛到香港/倫敦/澳洲,有時d鑊真是卸無可卸,他就要硬吃,他甚至同我講過好驚如果再攪不掂就要比人炒魷魚.都不怪得之他咁仲意捉住我地吹水減壓．

至於CEO就更加不駛講,d生意好就好地地,不過生意差少少的話,真是賺少d都比Wall Street班大帝同d股東大把大把咁括，再不掂呢就第一個比人攞去祭旗－－即炒，要好似Steve Jobs 咁傳奇地翻身就好難啦.而呢間公司呢就四年內換了三個CEO,之前的CEO完全消聲匿跡，如果d貨好似CEO咁貨如輪轉就好了.

所以我同自己講，升乜鬼呢，比個CEO我做都不會開心.我不要做得咁辛苦，咁大壓力．我而家雖然不可以很潚灑地一放工就完全不想公事，但都真是好少想，基本上放工就是放工，可以有時間心情做自己鍾意的事．錢是揾不曬的，揾少ｄ錢，多翻ｄ自由自在同閒情，咁先至係人生嘛．

不過又真是好少人會咁想，如果講出來仲分分鍾比人話係Loser Mind．

究竟係我怪定係人地怪呢？