金庸的道理---報仇

Ok，Ok，我承認，金庸除左搞到我變大近視之外，佢既故仔都有好多做人的道理。

在射鵰之中，周伯通雖然比黃藥師打繼雙腳仲困在桃花島十五年。雖然失去自由，但係佢都一樣自得其樂喎，仲因為得閒得滯，自創左一套七十二路空明拳添；又因為想整蠱郭靖，而「唔小心」學識埋九陰神功。

咁一下子周伯通既武功完全超越黃藥師，但係佢都無揾黃藥師報仇喎，只係拍拍手就走左去。

黃老邪一世型英帥，但係今次都完全比周伯通比下去。

講到九陰真經既始創人黃裳就仲有趣，佢因為得罪明教中人，而被人打到重傷仲殺晒佢左全家父母妻兒。黃裳僥倖逃脫，哩埋在窮鄉僻壤練功，要替佢既家人報仇，終於比佢領悟到九陰神功。

咁黃裳好開心啦，就出山報仇，點知周圍都揾唔到佢ｄ仇人喎。黃裳揾左好耐，最後先揾到一個女子。當年郁手時個女仔只係一個十六歲既小妹妹，但係而家一下子變成六十幾歲既阿婆喎。

原來黃裳多年潛心修練，完全不知時日過，在山中不知不覺就住左四十幾年啦。當年殺佢全家既仇人，個個都一早死晒，而依個六十幾歲既阿婆都已經風燭殘年，唔駛殺佢都過幾日就會死。

見到咁既情況，黃裳心中多年既怒火同深仇大恨突然之間無晒。

周伯通就話啦：「其實唔駛鑽研甚麼武功呀，其實大家鬥長命未得囉。咁一鬥四五十年，個老天爺就自自然然幫你收拾晒ｄ仇人嫁啦！」

當時靖哥哥隠隠覺得有ｄ唔妥，咁我讀既時候都係，不過又講唔出究竟有乜唔妥喎。

不過依家明啦，除左要鬥長命之外，仲要鬥活得開心囉。

老頑童被困在桃花島反而唔駛驚比瑛姑揾到，可以潛心練武，佢咁武痴，真係十五年好易過。之後仲要好搞笑地同返瑛姑一齊，咁，老頑童就真係一生都無虧欠任何人，活得自在又心安理得。

而黃老邪呢？愛妻早逝，如果唔係有蓉兒依個女既話佢係會去殉情，雖然無自殺但係心都死左，仲要比陣玄風同梅超風偷左九陰真經，仲要遷怒於人，打斷晒所有弟子既腳兼逐出桃花島，鑄成一生既遺憾（雖然佢唔認）。

你話呀，邊個開心ｄ呀？

最甜蜜既報仇，就係自己活得開心、活得好。

貓

數怪哥哥個鄰居有三隻貓，我有個朋友都有三隻喎，三隻都係執返來既。

第一隻強仔好活潑好動，仲好大膽地，成日都會坐在窗台睇對面屋既電視。佢住廿二樓嫁，真係一有失足，就算貓有九條命都可能唔夠用。又有硏究發展原來識睇電視既貓係蠢ｄ嫁，ｄ轉數快既貓係可以見到電視原來係一個個畫面快速出現既，對佢地來講電視只係閃下閃下，唔會有興趣睇。會睇電視既貓，係果ｄ鈍ｄ，好似人類眼睛咁殘像夠耐，會見到motion picture囉。

原來強仔係傻強。

第二隻猫光仔係單眼既，朋友係去大嶼山時聽到佢既叫聲而執佢返屋企既，光仔又濕又污糟，已經全身生蝨，眼同耳仔都有感染。朋友帶佢去睇獸醫，但係始終都有一隻眼醫唔返。

唔知係未因為生命在剛開始時對光仔實在太差呢，光仔好細膽同驚青。一有陌生人入屋，光仔就會一枝箭咁衝入房，損入佢自己個小小猫屋入面。貓係有眼神嫁，你可以睇得出佢真係好驚。媽媽都會特別照顧身體差ｄ、比較無咁叻既孩子，朋友亦都特別緊張光仔。

第三隻猫叫奶茶，事緣朋友既公司發現左一窩三隻未開眼既貓仔，如果打電話比愛護動工協會既話，佢地收左未開眼貓仔就一定會人道毁滅左佢地。朋友其實已經照顧唔到更多猫，但係都唔忍心，就暫時收留佢地，揾人領養。

朋友幫佢地改名叫做咖啡、奶茶同鴛鴦。顧名思義，咖啡係深啡色既，好靚好神氣，係第一個比人收養既；鴛鴦黃啡相間，都好靚好快有人肯要；而奶茶呢，係一隻土黃色既小貓，唔靚、唔出色，一直都無人要。朋友養佢耐左，都開始有感情，結果未收養埋佢囉。命運有時好奇妙既，奶茶雖然唔夠靚，但係就反而因為咁而揾到好主人。

傻強、光仔同奶茶，你地真幸福！

快樂多角度（9）- 完美

有聰明人講:

『人生不要太圓滿，有個缺口讓福氣流向別人是很美的一件事。

在一個講究包裝的社會裡，我們常禁不住羨慕別人光鮮華麗的外表，而對自己的欠缺耿耿於懷。 

但就我多年觀察，我發現沒有一個人的生命是完整無缺的，每個人多少少了一些東西。

有人夫妻恩愛、月入數十萬，卻是有嚴重的不孕症; 有人才貌雙全、能幹多財;情字路上卻是坎坷難行；有人家財萬貫，卻是子孫不孝；有人看似好命，卻是一輩子腦袋空空。
 
每個人的生命，都被上蒼劃上了一道缺口，你不想要它，它卻如影隨形。

以前我也痛恨我人生中的缺失，但現在我卻能寬心接受，因為我體認到生命中的缺口，彷若我們背上的一根刺，時時提醒我們謙卑，要懂得憐恤。

若沒有苦難，我們會驕傲，沒有滄桑，我們不會以同理心去安慰不幸的人。

你不需擁有全部的東西，若你樣樣俱全，別人吃什麼呢？

要知道每個生命都有欠缺，我不會再去與人作無謂的比較了，反而更能珍惜自己所擁有的一切。

所以，不要再去羨慕別人如何如何，好好數算上天給你的恩典，你會發現你所擁有的絕對比沒有的要多出許多。

而缺失的那一部分，雖不可愛，卻也是你生命的一部分，接受它且善待它，你的人生會快樂豁達許多。

如果你是一個蚌，你願意受盡一生痛苦而凝結一粒珍珠，還是不要珍珠，寧願舒舒服服的活著？

如果你是一隻老鼠，你突然發覺你已被關進捕鼠籠，而你前面有一塊香噴噴的蛋糕，這時，你究竟是吃還是不吃呢？ 

早期的撲滿都是陶器，一旦存滿了錢，就要被人敲碎；如果有這麼一隻撲滿，一直沒有錢投進來，一直瓦全到今天，他就成了貴重的古董，你願意做哪一種撲滿？

你每想到一次就記下你的答案，直到有一天你的答案不再變動...那就是你成熟了！』

有關閱讀:The Missing Piece

=================================
The Original Text:

In this society that emphasizes on the packaging, we would sometimes inevitably envy other people’s good looks, and lament about our own imperfection.

But in my years of experience, I have discovered that there’s no one life that is perfect, everyone has a lack of something.

Some couples are very loving, monthly salary of 10K+, but they could have problems bearing child.

Some people have the looks and talent, but could have a rough time in relationships.

Some people have lots of money, but they don’t have filial children.

Some people look to have a good life, but their brain could be empty all their life.

Everyone’s life has been designed with imperfections,you may not want it, but it will follow you.

I used to hate my imperfection, but now I have learnt to accept it with open arms. Because I understand that the flaw in life is like a spike on our backs, reminding us to be humble and to emphatise with others.

If there are no hardships, we will be complacent. If there is no depression, we cannot emphatise and console those who are less fortunate.

I also believe that life cannot be too perfect, having a crack to let happiness flow to others is a beautiful thing.

You don’t have to have everything. If you have everything, what’s left for the others?

Also recognise that life has flaws,that I will not compare myself with others, instead cherish what you already have.

So, don’t go around envying others, count the blessings that Heaven has bestowed upon you, you will find that there are more things that you have than things that you don’t have

And what you do not have, although not lovable, is very much part of your life,
accept and appreciate it, and your life will be much happier.

If you are a clam, do you want to bear all the pains to produce a pearl...or you do not want the pearl and choose to live comfortably?!

If you are a mouse, you suddenly find yourself captured in a rat trap and in front of you is a piece of delicious cake, do you eat the cake or not?!

Early piggy banks are made of clay, once it is filled, it has to be broken…

If there is such a piggy bank, no money has been put into it, until today and it has become a very priceless antique…Which piggy bank do you wish to be?!

Everytime you think of it, note down your answers…

Until a day when your answers does not change…

Then you are mature!

德哥

我以前的一個老闆德哥，雖然當時覺得佢係奇人，而家諗反其實係一個正常不過既中年男人。

當年仲係我第一份工，在我果個名好聽但勁呃秤既兩年trainee生涯後，德哥收留左我，結束左我不停轉department既人球生涯，終於落戶可以有一個打長工既感覺。

德哥有一切成功男士既特徵－－－地中海，佢有次話自己既外貌令佢係事業上有好大優勢，但係令佢既私人生活好不濟。嗯，德哥點睇都年過四十，佢咁講，莫非係同自己平反，原來只有三十九？

不過德哥真係有好好保養自己嫁，雖然當佢話自己成日去做尖時，大家既目光都不期然快速地瞟向佢又高又瘦既火柴人身材,同埋佢一ｄ都唔大隻既手臂同心口，之後再交換疑惑眼神。但係德哥真係無肚腩，於是大家既結論係，德哥在尖應該係做sit-up同大休息。

我一直懷疑德哥其實係色盲既，依個係由佢令人側目既衣著估出來。佢至愛既一個色彩佩撘係：紫色裇衫＋墨綠色西褲，中間用黑色皮帶勒出一條纖纖細腰，真係在３０米以外都可以見到佢。

由於工作沈悶，德哥一有新look時，大家都會好雀躍咁爭相奔告。佢地唔敢當面嘲笑德哥，結果就退而求其次，走過來笑我。實情又關我乜事？我不過唔好彩地係德哥條team，又咁岩坐在jump水既必經之路姐。搞到成日晨早流流，我都未見到德哥，已經有人陰陰嘴笑走過來，向我形容德哥當日既打扮，順道例牌地嘲笑我一番。

有一次德哥唔知係咪諗住去打golf，竟然白色長袖polo、白色長褲再加白色閃光漆皮鞋咁返工，十足當年蔡ｘ華既白馬王子造形。最慘係，佢件polo裇係綿質既白中帶米色，條褲就係尼龍既閃亮白色，搞到件衫好似洗唔乾淨咁，白馬王子跌左落泥tum，變成乞丐王子。。。

果朝係我有史以來比人嘲笑得最多既一日，ｄ閒人乾脆連群結隊咁過來問我老闆發生乜事。而我，真係有ｄ想揾個loan捐下，又或者比我調去一個離水機遠ｄ既位。

咁德哥作為一個中年男人，就緊係有中年危機啦。佢雖然有一個老婆同三個仔女，但係永遠都有人同我報料，話見到德哥在不同既場合拖住不同既少女出現．．．佢老婆年年annual dinner都有出席，大家都知邊個先係正印。而最勁爆既，係大陸同事爆料比我知，話有一次佢出trip去北京時，係順道帶埋一個女友去玩。。。係用公帑喎，仲要係同事面前咁做，德哥係得既。

咁，人到中年，就緊係要揾ｄ細自己十零廿歲既小妹妹拍吓拖啦，自己都可以感染反ｄ青春氣息，個人都後生ｄ嘛。

不過，德哥對佢老婆雖然係用佢一貫潮州硬漢式既呼呼喝喝，再加洗工人式既粗魯態度，但你又唔可以話佢唔愛老婆喎。雖然佢太太而家已經不再年輕貌美，完全係一個黃面婆，但係都同佢生左三個細路，真係無功都有勞丫，德哥都有表示嫁。

有次德哥約埋我地依班做細既去佢屋企bbq，之後就開始在佢個mini酒櫃入面一枝枝酒攞出來講解，由法國幾大酒莊講到澳洲智利美國，在環遊世界兼好似過左十年之後，佢ｄ小朋友忽然捧出生日蛋糕。

原來德太果日生日，大家當堂醒晒，一齊唱生日歌，德哥仲開左一枝唔知乜fit既八幾年紅酒來慶祝。我一向唔鍾意紅酒既味道，而我果杯好貴既紅酒真係好苦澀，我才疏學淺，但係ｄ咁鬼舊既酒唔係要透下氣嫁咩？德哥一開就倒出來飲，我好bad taste地，寧願渴涷檸賓。

德太都好似唔多欣賞ｄ酒，呷兩下就比德哥喝埋佢；但係由德太少見既笑容可以睇得出，佢果刻係幸福快樂既！

前幾日在街再碰到德哥，佢頭髮再少左、大眼袋、肚腩突出，氣息好差。但係佢仍然好勁爆地著住彩藍色既絲質裇衫，件衫簡直識發光嫁，德哥仍然係令人在３０米以外都可以見到佢。

其實在科學家未揾到青春之泉前，如果touch wood唔死既話，人人都會老。

德哥點解唔學似ｄ法國人咁，老得有尊嚴、有格調一ｄ呢？

生死

馬先生既離世，難道就可以抺殺佢之前既言論嗎？人人都會死既，如果咁易一筆勾消，豈不無人需要為自己既言行負責？？？

人貴頂天立地，保持脊樑挺直。人生於世只係過客，但係在生活依本書上自己到底寫下ｄ乜野，全睇你自己。

馬生當日既言行，歷史自會記錄。

今日八月八日，離北京辦奧運剛好一周年，在歌舞昇平背後，人民不會忘記。

變形金剛

令人跌破眼鏡既係我竟然走去睇變形金剛。無計，依期無乜戲好睇。

想當年我其實差唔多所有男仔卡通片都睇，唯獨是唔睇變形金剛。我梗係覺得一個好地地既機械人變成一架車係一個好蠢既概念，而更蠢既係如果個機械人變成做車，就唔可以因應環境狀況而變做其他野，比如船呀、飛機咁。哇，只可以變成一樣野既機械人，又點稱得上變形金剛？

不過我細佬同一班男同學十分之極度咁迷變形金剛，集集都風雨無阻一定睇，仲要不停討論戲情同扮變形金剛．．．最搞笑係我細佬佢地班人有一次見到架貨櫃車，跟住就好雀躍地周圍講話架車十足柯栢文．．．聽完之後真係要無語問蒼天。

睇完依部戲後，我先知原來係「博」派同狂派，以前我一直好疑惑，點解叫「國」派，莫非係「國」字臉？咁係正邪大戰之中，就梗係幫人類既博派係正義之師啦。

但係，點解博派要幫人類呢？當哥倫布發現新大陸之後，對於當地原居民真係極盡巧取豪奪、殺人唔眨眼。又，如果唔係因為原居民對歐洲人帶來既病菌毫無抵抗能力，因此而發生大瘟疫而死得七七八八既話，當年既白人就唔駛好「貴」地山長水遠在非洲捉奴隸，直接就將佢地賣曬來做奴隸。咁美國既南北戰爭就唔係因為黑奴而係紅奴lu。

我地人類自己明明係狂派，又憑乜野要求外星係博派？仲有好似柯栢文同大黃蜂咁無私，要犠牲自己來保護我地呢？真係同你有親？

咁我當外星人進步文明ｄ啦，咁比多幾百萬年，人類又可唔可以進化到無戰爭、唔再持勢欺人呢？

請記得，有人類幾耐，就有戰爭幾耐。

快樂多角度(8) - 永不抱怨

正能量超新星On Dog哥哥post左一段超級正能量影片，比我依ｄ一集洛奇都無睇過既人都可以义义電。

而我深刻既一段說話，唔係洛奇比人quote完又quote既：「等我話比你知你一早已經知道既野，人生唔係只有陽光同彩虹，依個係一個好險惡無情既世界，無論你幾咁tough都好，如果你放棄，佢就會打到你跪在地永遠都爬唔返起身。人生既打擊比任何人更重手，但最重要既唔係你可以出手幾重，而係你有幾捱得打兼仲可以繼續前進，係你究竟可以哽到幾多打擊而都繼續前進，咁樣先可以嬴！」

我最深刻既反而係洛奇個仔果ｄ怨天怨地既說話：怨老豆太出名，怨自己永遠活在老豆既陰影下，怨洛奇如果比賽輸左會連累佢都跟住出丑．．．真係典型既ＬＯＳＥＲ。

洛奇話個仔既說話好岩：「你由得人地指著你塊面，閙你没用，當你遇到困難既時候，就開始周圍揾野來賴。」

「如果你知道自己既價值，咁就去爭取你應得既野，但係你首先要願意承受打擊，而唔係周圍手指指，話你今日搞成咁都係因為依個、果個或者是但邊個人！只有懦夫先會咁做，而你唔係懦夫。」

如果要開心既話，好重要既一點係要承擔責任，清楚自己既今時今日既問題，都係自己一手做出來。而唔係有乜事都賴左人先；亦都唔係諗到無人好賴，就轉移視線賴社會、政府、經濟轉型、教育制度又或者皇后碼頭就來要拆；更加唔好問埋曬Ｄ無謂問題：點解我老豆唔係李嘉誠？點解我唔係徐子祺？點解我唔係文萊國皇？點解天要下雨?(依個係講我。)

抱怨唔單止產生強烈怨念同負能量，仲會令自己永遠都唔敢正視問題既癥結所在；連問題既真正厡因都面對唔到，咁又點可能解決佢？

所以，真係永遠永遠永遠永遠永遠永遠永遠永遠永遠永遠永遠永遠永遠永遠唔好抱怨。

風水佬呃你十年八年，但係，只要你留心自己既思想，停止抱怨兩個星期，包你既生命會發生轉變，仲會因為自己終於承擔起問題既責任而為自己而自豪，人亦會變得開心。

試吓丫！


又，On Dog哥哥，不過唔明藍天理論果部份喎。我只聽過話今年夏天咁藍天，係因為吹南風咋喎，可唔可以解釋下？

牛

故事一則：

在好耐好耐之前，人類無任何家畜可以幫助務農，要用自己既muscel power在好天曬落雨淋既情況之下耕田。

土地公公見到人類咁辛苦，於是走去揾牛神，請佢下凡幫助人類。牛神本着慈悲之心，都好想幫人；但係又擔心，說：

「人類好忘恩負義嫁喎，我下凡之後佢地會唔會好好地對我嫁？」

土地公公就拍心口保證，話：

「放人啦，我以我爺爺之名發誓，人一定會當你係上賓招待；如果唔係，就罰我一世做無殼蝸牛，永遠無瓦遮頭！」

得到土地公公既保險，牛神就下凡鞠躬盡緒地幫人類耕田；而人類又點對待牛？Well，結果咪從此以後土地公公都無瓦遮頭囉。


古時西方人以打獵為生，所以狗係佢地最好既朋友，一直對佢地如珠如寶，聴到有人吃狗肉都會噁心嘔吐打冷震。

咁中國人以務農為生，牛應該係我地最好既朋友，點解我地又吃肥牛呢？媽媽話佢細個在鄉下時，係無人吃牛既，有次一隻牛年老多病要安樂死，阿婆就喱在屋企屋企抱住媽媽同阿姨係度喊。

反正依家又無新鮮牛，英國又爆發口啼疫，仲有揮之不去既瘋牛症．．．不如吃少ｄ牛啦。唔食牛，皮膚都好ｄ，暗瘡都少ｄ，人都靚ｄ呀！

快樂多角度(７) - 知足

大師留言，關於點樣一生至算係好:

『其實生蓬當下，處於香港，可以上網風花說月，已經足矣。

首選無債，金錢債，感情債，親情債。

無債則心自由，其它隨緣游走，把握機遇，盡情嘗新，不枉此生。』


我地真係處身於一個飽食年代，但係我地又有幾開心呢？咁我地一定開心過其地同樣在地球村中，捱緊饑荒同戰亂既人，但係當一ｄ最基本既需要－－－食物、乾淨水、有瓦遮頭、人身安全有保障之後，我地又有幾何會因為自己有幸生在香港、識字仲識打字、有錢有閒上網而覺得開心感恩呢？

點解我地已經係全人類之中最幸福既百份之一，都仲係有咁多煩惱同唔開心呢？點解我地都仲係成日傷春悲秋呢？

因為人心不足囉。

有時真係覺得依個真係人類一個天生出來既default settings，我地在度追追趕趕、營營役役，為理想而奮鬥，不過到你目標達到時，成功既果實原來唔係好似想像之中咁甜美，甚至會變得苦澀，覺得後悔。

我地到底同自己講過幾多次：「只要我xxx，咁我就會開心。」？

結果呢？到你真係xxx時，又有幾開心？

所以好多時候我地會見到未結婚既人想結婚，結左婚既人想單身；不育既夫婦想生仔，有小朋友既父母又煩惱教育子女同點樣揾到四百萬；冇錢既人恨發達，捱到真係有錢但係全身病時想要健康；在一事無成時想要出人頭地，到事業有成時就想要返放棄左既愛情，緬懷失去左既青春。。。

幸福係乜野呢？莫非就真係一隻藍鳥，稍縱即逝，永遠都捉不到？

其實藍鳥係乜野呢？咪就係自己不定既心囉。因為心永遠得一想二，對自己擁有既一切視而不見，永遠只看見自己缺失既野。而當目標達到時，只會高興一兩日，當個adrenaline high過左之後，又覺得不外如是，又覺得人生有欠缺，又再揾到其他既目標。。。一次又一次咁，循環又循環。


到底係藍鳥玩你，定係自己個心作怪？



我問大乘法師點樣先可以開心，答案只有兩個字：『知足。』

瘋狂工作間

晨早流流發現LAN線唔着，上唔到網、print唔到野、check唔到email，Support唔知幾時先來，於是在地下既一堆藍色同灰色線之中揾返邊條打邊條，結果．．．得左！比我揾到係邊條線鬆。但係Support哥哥來到之後，竟然幫我全部整甩曬，又要再揾返線。


有個客又再一次唔記得password，哥仔reset出來既新password係－－－"forgot"。


有個interviewee坐在meeting room十五分鐘之後，竟然打我電話問幾時可以去見佢，唉，已經三十幾歲人啦，唔係真係扮下有耐性都唔識呀化？


供應商打電話來講張支票彈左，因為數字寫$352.00，英文寫Three Hundred Fifty Six．．．好想死左佢算。


客人打電話來第一句係：「我竟然打通左呀，我要買六合彩。」
真係hurt，真係好唔慣比人咁潤法，唔夠人又請唔到人呀嘛，我都已經成個Receptionist咁樣聽電話囉喎。