2007年8月25日 星期六

德哥

我以前的一個老闆德哥,雖然當時覺得佢係奇人,而家諗反其實係一個正常不過既中年男人。

當年仲係我第一份工,在我果個名好聽但勁呃秤既兩年trainee生涯後,德哥收留左我,結束左我不停轉department既人球生涯,終於落戶可以有一個打長工既感覺。

德哥有一切成功男士既特徵---地中海,佢有次話自己既外貌令佢係事業上有好大優勢,但係令佢既私人生活好不濟。嗯,德哥點睇都年過四十,佢咁講,莫非係同自己平反,原來只有三十九?

不過德哥真係有好好保養自己嫁,雖然當佢話自己成日去做尖時,大家既目光都不期然快速地瞟向佢又高又瘦既火柴人身材,同埋佢一d都唔大隻既手臂同心口,之後再交換疑惑眼神。但係德哥真係無肚腩,於是大家既結論係,德哥在尖應該係做sit-up同大休息。

我一直懷疑德哥其實係色盲既,依個係由佢令人側目既衣著估出來。佢至愛既一個色彩佩撘係:紫色裇衫+墨綠色西褲,中間用黑色皮帶勒出一條纖纖細腰,真係在30米以外都可以見到佢。

由於工作沈悶,德哥一有新look時,大家都會好雀躍咁爭相奔告。佢地唔敢當面嘲笑德哥,結果就退而求其次,走過來笑我。實情又關我乜事?我不過唔好彩地係德哥條team,又咁岩坐在jump水既必經之路姐。搞到成日晨早流流,我都未見到德哥,已經有人陰陰嘴笑走過來,向我形容德哥當日既打扮,順道例牌地嘲笑我一番。

有一次德哥唔知係咪諗住去打golf,竟然白色長袖polo、白色長褲再加白色閃光漆皮鞋咁返工,十足當年蔡x華既白馬王子造形。最慘係,佢件polo裇係綿質既白中帶米色,條褲就係尼龍既閃亮白色,搞到件衫好似洗唔乾淨咁,白馬王子跌左落泥tum,變成乞丐王子。。。

果朝係我有史以來比人嘲笑得最多既一日,d閒人乾脆連群結隊咁過來問我老闆發生乜事。而我,真係有d想揾個loan捐下,又或者比我調去一個離水機遠d既位。

咁德哥作為一個中年男人,就緊係有中年危機啦。佢雖然有一個老婆同三個仔女,但係永遠都有人同我報料,話見到德哥在不同既場合拖住不同既少女出現...佢老婆年年annual dinner都有出席,大家都知邊個先係正印。而最勁爆既,係大陸同事爆料比我知,話有一次佢出trip去北京時,係順道帶埋一個女友去玩。。。係用公帑喎,仲要係同事面前咁做,德哥係得既。

咁,人到中年,就緊係要揾d細自己十零廿歲既小妹妹拍吓拖啦,自己都可以感染反d青春氣息,個人都後生d嘛。

不過,德哥對佢老婆雖然係用佢一貫潮州硬漢式既呼呼喝喝,再加洗工人式既粗魯態度,但你又唔可以話佢唔愛老婆喎。雖然佢太太而家已經不再年輕貌美,完全係一個黃面婆,但係都同佢生左三個細路,真係無功都有勞丫,德哥都有表示嫁。

有次德哥約埋我地依班做細既去佢屋企bbq,之後就開始在佢個mini酒櫃入面一枝枝酒攞出來講解,由法國幾大酒莊講到澳洲智利美國,在環遊世界兼好似過左十年之後,佢d小朋友忽然捧出生日蛋糕。

原來德太果日生日,大家當堂醒晒,一齊唱生日歌,德哥仲開左一枝唔知乜fit既八幾年紅酒來慶祝。我一向唔鍾意紅酒既味道,而我果杯好貴既紅酒真係好苦澀,我才疏學淺,但係d咁鬼舊既酒唔係要透下氣嫁咩?德哥一開就倒出來飲,我好bad taste地,寧願渴涷檸賓。

德太都好似唔多欣賞d酒,呷兩下就比德哥喝埋佢;但係由德太少見既笑容可以睇得出,佢果刻係幸福快樂既!

前幾日在街再碰到德哥,佢頭髮再少左、大眼袋、肚腩突出,氣息好差。但係佢仍然好勁爆地著住彩藍色既絲質裇衫,件衫簡直識發光嫁,德哥仍然係令人在30米以外都可以見到佢。

其實在科學家未揾到青春之泉前,如果touch wood唔死既話,人人都會老。

德哥點解唔學似d法國人咁,老得有尊嚴、有格調一d呢?

16 則留言:

seikomatic 提到...

Taste屎呢樣野,一半系天生既,另一半睇有無人開聲...

學霖山莊 提到...

最緊要係德哥佢自己覺得ok,
那麼便夠... ;)

p.s. - 咪叫醒佢...

on dog 提到...

眾人皆醒佢獨醉?

冇話誰醉誰醒, 但同norm不符的人, 就被看似異類, 可以理解!

"而家諗反其實係一個正常不過既中年男人。"
咁點解又要佢"學似d法國人咁,老得有尊嚴、有格調一d呢?"

:)

hitcake 提到...

路過, 極之欣賞閣下風趣優默既文采, 笑到我眼淚水都標出來.......XD

火鶴 提到...

隨波逐流, 才叫有格調?
可能, 德哥一直都係維護緊佢嘅尊嚴.

ak 提到...

Samsara姐姐,

well...其實著衫既野...講真...著係佢自己身上,又唔係迫人換制服,佢自己哽得落既...AK一向都唔會太理,但係如果攪到AK有麻煩,又真係要諗諗佢...畢竟...成樓奶咁番工又真係好似太過份...

Samsara 提到...

大師:Taste屎呢樣野,最差就係我啦,我真係幾鍾意新出果隻低糖有氣利賓納嫁。

學霖哥哥;德哥睇人眉目眼額既功夫高我十倍,唔係無人叫佢,係佢唔想理。

On Dog哥哥:中呀你,佢其實真係一個正常不過既中年男人。

hitcake:好彩都可以博君一笑,我之前因為怕太無口德,而猶豫左一陣好唔好出依篇文...

火大俠:嗯,令我諗起掃帚頭添你個comment,我只可以講,連掃帚頭都終於剪頭髮囉。

AK哥哥:嘩,工一份姐,唔駛連靈魂都出賣呀嘛。咁德哥又無上腦到以為自己係神,要我地吃既、著既、諗既都要岩佢口味。

不過德哥d衣著真係搞到我比人笑呀!

on dog 提到...

"不過德哥d衣著真係搞到我比人笑呀!"

咁係個D人既問題姐, 德哥點著關妳X事呀...? 點解要連累到SAM姐呢?

馬老板 提到...

中國人係唔會認老嫁, 如果老左好似辛康納利咁, 又唔怕呀.

我覺得最緊要係有健康的身體和正面的思維. 外表自然會反映出來了

Samsara 提到...

On Dog哥哥:佢地係同我玩既,我諗佢地覺得取笑我老闆d咁令人心涼既野,無理由唔預埋我,不過,講真,當年我真係有覺得比德哥影衰嫁。

馬老板:其實中國人係好尊重老人家既,越老越有地位,而且叫老人係尊稱來(e.g.,老師傅,老太太)。而且依家內地人都係好open地講年齡,我就比人問過n次年齡啦,而且連明星都係主動講自己年齡,比如我睇過鞏莉既訪問,佢自己直接就講今年我xx歲咁呀。

唔認老應該係美國思想來,但係抗拒自己係一日會比一日年紀大,等於抗拒天要下雨,真係自己攞來辛苦。

渣估 提到...

德哥同Wyman 咪九成似?

渣估年紀都唔細, 睇完你呢篇文, 都想執過晒個衣櫃! Samsara 姐姐有冇乜野指引?

Samsara 提到...

死啦,渣老闆真係影像思維,我下次講人壞話唔會寫得咁具體...

嗯,我依期呢,就最鍾意男人大熱天時著黑色三件頭西裝加白裇衫;如果好似Gideon咁有大肚dum,就緊係扣唔到背心最低果粒紐啦;再加上圓禮帽同是的,留埋小胡子...係咪好經典呢?

數怪 提到...

似係肥版魔術師喎!

Samsara 提到...

哈哈,乜數怪哥哥執得咁正反工嫁。你溜唔溜冰呢?

其實,你做乜叫不敗魔術師呢?魔術師已經唔明,不敗...咁你有睇開金庸嫁啦,係不敗唔係求敗喎,咁,未係。。。

數怪 提到...

香水妹妹你係咪失左憶!?

銀河英雄傳說喎!

Samsara 提到...

吓,真係楊威利來嫁果幅相,你之前又唔答我,邊有人叫佢做不敗魔術師姐,係叫佢不敗的楊又或者魔術的楊之嘛。

楊,我之前見到你個名,只諗到東方不敗囉。

唉,我本來諗住可以量下地,不務正業咁煲下漫畫睇多次銀英咁,結果,而家忙到我呀。