2007年8月31日 星期五

金庸的道理---報仇

Ok,Ok,我承認,金庸除左搞到我變大近視之外,佢既故仔都有好多做人的道理。

在射鵰之中,周伯通雖然比黃藥師打繼雙腳仲困在桃花島十五年。雖然失去自由,但係佢都一樣自得其樂喎,仲因為得閒得滯,自創左一套七十二路空明拳添;又因為想整蠱郭靖,而「唔小心」學識埋九陰神功。

咁一下子周伯通既武功完全超越黃藥師,但係佢都無揾黃藥師報仇喎,只係拍拍手就走左去。

黃老邪一世型英帥,但係今次都完全比周伯通比下去。

講到九陰真經既始創人黃裳就仲有趣,佢因為得罪明教中人,而被人打到重傷仲殺晒佢左全家父母妻兒。黃裳僥倖逃脫,哩埋在窮鄉僻壤練功,要替佢既家人報仇,終於比佢領悟到九陰神功。

咁黃裳好開心啦,就出山報仇,點知周圍都揾唔到佢d仇人喎。黃裳揾左好耐,最後先揾到一個女子。當年郁手時個女仔只係一個十六歲既小妹妹,但係而家一下子變成六十幾歲既阿婆喎。

原來黃裳多年潛心修練,完全不知時日過,在山中不知不覺就住左四十幾年啦。當年殺佢全家既仇人,個個都一早死晒,而依個六十幾歲既阿婆都已經風燭殘年,唔駛殺佢都過幾日就會死。

見到咁既情況,黃裳心中多年既怒火同深仇大恨突然之間無晒。

周伯通就話啦:「其實唔駛鑽研甚麼武功呀,其實大家鬥長命未得囉。咁一鬥四五十年,個老天爺就自自然然幫你收拾晒d仇人嫁啦!」

當時靖哥哥隠隠覺得有d唔妥,咁我讀既時候都係,不過又講唔出究竟有乜唔妥喎。

不過依家明啦,除左要鬥長命之外,仲要鬥活得開心囉。

老頑童被困在桃花島反而唔駛驚比瑛姑揾到,可以潛心練武,佢咁武痴,真係十五年好易過。之後仲要好搞笑地同返瑛姑一齊,咁,老頑童就真係一生都無虧欠任何人,活得自在又心安理得。

而黃老邪呢?愛妻早逝,如果唔係有蓉兒依個女既話佢係會去殉情,雖然無自殺但係心都死左,仲要比陣玄風同梅超風偷左九陰真經,仲要遷怒於人,打斷晒所有弟子既腳兼逐出桃花島,鑄成一生既遺憾(雖然佢唔認)。

你話呀,邊個開心d呀?

最甜蜜既報仇,就係自己活得開心、活得好。

23 則留言:

學霖山莊 提到...

最甜蜜既報仇,就係自己活得開心、活得好。
好! 真的好!

ak 提到...

Samsara姐姐,

AK係金庸既書入面學到好多野...其中最buy既一定係甄素素同阿仔張無忌講:「千祈唔好信女人...愈靚既女人愈會騙人...」

至於報仇...AK都係比較buy「親切的金子」...

on dog 提到...

"最甜蜜既報仇,就係自己活得開心、活得好。"

......

咁, 心中始終係有仇念, 為報仇而活得開心?
...那如何"活得開心、活得好"呢?...

(諗唔通...)

AK兄: 「親切的金子」...cool! (小心唔好得罪你...)

on dog 提到...

另外, 小9明白了! 最活得開心、活得好, 就是冇野在乎! 不過, 冇野在乎, 人會變成一舊飯!

又係Balance呢個TOPIC~~~ 呀~~~

C.M. 提到...

"最甜蜜既報仇,就係自己活得開心、活得好。"

我就話最甜蜜既報仇,就係令對方知道之前做錯左(if any),令佢活得真正開心、活得好。

渣估 提到...

Samsara 姐姐: 仁者無敵! 可敬! 渣估十年前有單野諗住一生人一定要報仇的, 今時今日, 那一刻的心情都已經煙消雲散了, 人都開心好多....

之不過...

世界上會唔會有咁戲劇既情況: 如果係殺父姦母燒屋... etc 而還可以逍遙法外的仇人, 怕且都要諗計仔報仇喇卦?

匿名 提到...

小的也有過金庸電視劇撈飯的日子,記得周伯通有追殺害死他兒子的裘千仞。

當然這篇文章內涵大慈悲,又有耶教左右面任摑的捨己色彩。看千帆皆過,望雲淡風輕,閉目自療。菩薩善舉,不是人人能及。

傳統智慧:「以直報怨,君子之所為」

老五

Hana 提到...

"最甜蜜既報仇,就係自己活得開心、活得好。"

活得開心、活得好點算得上報仇呢?人本來就有責任令自己活得開心、活得好。而且可能對方已經唔記得你,你好唔好佢根本都唔關心,你點稱得上報仇呢?

Karen (Sze) 提到...

又係最緊要正字時間:

係郭靖而不是"敦靖", 請改正。

周伯通同洪七公都係我欣賞的人物, 既好武功兼好幽默, 他們一出場就好開心。

想報仇咩, 「其實大家鬥長命未得囉。咁一鬥四五十年,個老天爺就自自然然幫你收拾晒d仇人嫁啦!」

咪得囉!

Samsara 提到...

學霖哥哥 :-D

AK哥哥:有靚女肯呃你,你應該覺得榮幸。個修書版好變態,黃老邪咁就仲唔開心多幾錢重。

果然係惡毒的上昇天蠍。。。我要睇親切的金子。。。嗔心重會變阿修羅,係有福無德咁解,有福無德喎,既係話有大能力但係用錯地方,變左作惡,真係好可怕既一個境地。

嘿,我上昇好似係天平,係咪要鬥猜謎呀?

On Dog哥哥:係要放下仇恨囉,唔係話要乜都唔care唔理,而係不執著任何事物,而同時又心存善念。

心無左執著,就唔會再心隨境轉,唔會再因為得失譽毁而七上八落,就係我所謂既真正自由。

好難嫁,有人話易咩?

CM哥哥:「我就話最甜蜜既報仇,就係令對方知道之前做錯左(if any),令佢活得真正開心、活得好。」

小妹真係佩服佩服!不過,你係咪真係咁諗嫁?你講既野,都係飲左Diamond Black之後果d我先信囉。

我今朝九點就返工,九點半已經搞惦晒d野啦,好眼訓好悶呀,星期六都要返,好命苦呀,鳴~~~

渣老闆:你講到d咁極端既例子就真係難講d,不過地依d平凡人所謂既「仇」,不外乎有人借錢唔還(借得就唔好諗住收得返)、 比人撬牆腳(兩個人之間無問題既話係無人撬到既)、生意比人搶左(優勝劣敗)、比人炒魷(你都炒唔少人啦),諸如此類。有乜好記恨報仇?

唉,又係天蠍。

王哥哥:好耐無見呀!你好嗎?周伯通係追裘千仞,不過係貓捉老鼠無諗住殺佢;裘千仞真係逃亡到頂唔順要自殺時,比一燈大師救返同點化。

裘千仞係周伯通既殺子仇人,周伯通都可以原諒佢;一燈大師攞唔到九陰真經、同瑛姑結下大仇、自己有犯下見死不求既大錯都係因為裘千仞而起,但係一樣原諒佢,仲救佢兼收佢為徒...

金庸好明顯係佛教徒,仲在好多地方宣揚寬恕,可惜d人只係見到咪信靚女果d囉。

又,你今次由頭到尾都無講錢喎,恭喜恭喜!

Hena姐姐:歡迎光臨!人地都已經唔記載你,你又記佢來做乜呢?心中一直有刺,又點可以真正活得開心呢?本來無諗住咁快寫,都係等我寫埋金庸的道理(二)慢慢講啦。

Karen妹妹:呀,連我至愛既靖哥哥個名都寫錯,即改。我都好鍾意洪七公嫁,佢又man又豁達囉,蓉兒煮飯比佢食果回,真係睇到我口水都流呀!

seikomatic 提到...

Same 師妹,

幾廿年前某人同俺講還珠樓主套【蜀山】,一書十冊,話里而有潛艇導彈。抬番屋企,睇左廿頁,太多人啦...又系乜水同乜水攪唔清...唔知有無人睇過單聲 fast forward 搵到潛艇導彈果幾頁?

霖霖果招好林青霞,sawlee,俺又睇得小,所以己經盡最大努力作比喻。

【天修佢】好似系無奈、無能為力的同意詞。

中文【不共戴天】真系好正,去到果種地步,唔系佢死就你亡。

唔駛講大仇,小仇日日有,不平事日日見,可以睇通已經 好捧 耶!

黑人 提到...

小弟以前玩會社興趣小組,見唔少因為仇怨而成立的對頭組織

不過呢d建基於憎恨的團體通常都唔持久

可能因為本身無正常的理念支撐,一旦d仇恨energy 燒晒之後就無以為繼

所以真係千祈唔好用仇人作為自己的定錨
咁樣會變得好被動

C.M. 提到...

香水妹妹:

拿,趁依家宿醉未醒,查實我真係咁諗架。不如你試下?

(我仲命苦呀,星期六都要一早起身返瑜伽,嗚~~~)

匿名 提到...

香水妹妹:?

(女人係水做的,Sam 妹妹是香水做的嗎?)

近來少留言係想小休一下。

「你今次由頭到尾都無講錢喎,恭喜恭喜!」

我的彈藥都困在股仔處坐艇中。所以唔講錢la。
遲d等d錢歸位,我會再講!^.^

王老五

ak 提到...

Samsara姐姐,

果然係處女座既黃金聖鬥士沙加,一野六道輪迴就將AK送左去修羅界...

係老查自己講架...佢話黃老邪同梅超風係原版入面已經係師生戀,不過既然上次寫得隱晦大家睇唔到,所以今次寫得清楚d...

其實,我又覺得,修左之後真係好睇d...老邪就更加邪...不過,睇過王家衛既東邪西毒之後,AK絕對係迷上左西毒歐陽峰...

匿名 提到...

講開錢,其實你個鬥長命理論,跟所有長線投資等回報的理論相同。

遇著近日風高浪急被迫至中線持有甚或長線持有其實也不壞。一怕就放,其實仲輸得金!
有時真要學菩薩一樣睡眼惺忪。

不過我的心理質素很差!等得d股仔回到價位,執少少就急急放。後來總是賺少好幾倍。係雙輸,戰勝不了股仔又敗給自己。

hehe..又講錢la

老五

out of syllabus 提到...

茅塞頓開,就此謝過。

獅子皇 提到...

Samsara 姐姐,

第一次係你度留言。

其實金庸既小說好多本都係佛偈黎,個人尤其鍾愛天龍八部,係成個故事入面表露哂人對呢個世間既一切執著,尤其係三大主角,佢地既身世、遭遇所引發既一連串事件,全因人既執著。

渣老闆個例子就好似蕭峰,恐怕十個無名老憎都冇辦法點得化 - 不過如果我係蕭峰,我都好難忘卻呢整整一生人咁多既恩仇,基本上都唔會有佢咁理智。

而家我心中都有仇要報,不過都係好似你咁講囉,唔需要殺你全家,燒你後欄,只要活得比你地好,比你地長命,睇你地之後點折墮,已經好足夠,總之一日未冚蓋,大家都未知輸贏。

Samsara 提到...

大師:唔睇武俠小說就岩啦,好上腦嫁。

想當年中史作業有是非題,有一條係問靖康之亂係咪由叛將郭靖同楊康引金兵入關?我竟然答「是」...果時我真係睇到short左呀!

我有唔鍾意既人、討厭既事,但係多數嬲完就算,最多唔睬佢,可以令我諗住要報仇雪恨既又真係無喎,你估基督山恩仇記咩?

【天修佢】、【不共戴天】...我真係要寫埋我個下集比較易講d。

黑人哥哥:會社興趣小組係乜東東?Game來?贊成建基於憎恨的團體通常都唔持久係因此佢地真係無grounding,所以d人一悶一攰就會解散。不過有時候仇恨係可以越煽動越變得大嫁,三K黨就係一個例子。

CM哥哥:真係咁諗?好勁呀!你係咪見左我開心左呢?

AK哥哥:我好獅子既,一d都唔沙加,係你自己係都要衝落修羅道,真係拉都拉唔住。

黃老邪邪極都唔夠金庸啦,最登峰造極既係天龍八部,真係意識變態過比三毛生前狂插既鹿鼎好多。

歐陽峰...書中練蛤蟆功、比蓉兒玩到要脫衣空中飛人、吃七公加料既烤羊、又忘恩負義要殺救佢既七公...佢神經錯亂之後仲可愛d。電影中就...自己親手放棄既,更加無野講。

王哥哥:你係突登既!我都仲係無買過股票,所以依排d過山車與我無關。不過我問過d朋友,真係個個都有買股,有一個話佢無買(咁我好開心啦),結果佢加一句話佢買外幣。

股市真係一個心理遊戲,邊個驚、邊個貪,邊個就會輸。Buffet揾接班人時都話,揾聰明人易,揾一個無輸錢基因既人難。可能因為人人都有d自毁傾向,又唔係人人都可以學老巴咁視錢財如糞土,話捐一大半身家就捐。

有時,你越緊張越放唔開,出來既效果反而仲差。

Out of syllabus:客氣客氣,我都係付出左一對近視眼先有此體會。

獅子皇:你又係獅子???

天龍八部真係貪嗔痴既典範,講到蕭峰,如果佢唔係一定要報仇,就唔會自己親手打死心愛既阿朱,如果佢可以放下仇恨,咁就可以同阿朱(甚至加埋阿紫)過返d左擁右抱、閒雲野鶴既生活啦。咁,又真係好難既,所以蕭大俠咪做左悲劇英雄囉。

又,我一直都唔多覺黃霑係才子既,直至真係睇左依首歌詞,短短84個字已經道盡蕭峰一生。誰知心醉朱顏 消逝煙雨間...唔怪得黃霑佢夠膽起筆名叫「霑」。

萬水千山縱橫
曲:顧嘉輝 | 詞:黃霑|
萬水千山縱橫 豈懼風急雨翻 豪氣吞吐風雷
飲下霜杯雪盞 獨闖高峰遠灘 人生幾多個關
卻笑他世人妄要將漢胡路來限 曾想癡愛相伴
一路相依往返 誰知心醉朱顏 消逝煙雨間
憑誰憶 意無限 別萬山 不再返

獅子皇 提到...

Samsara 姐姐,

我絕對係一隻獅子,不過還未養成獅子應有既皇者氣度。

天龍八部暫時翻睇左三次,真係每次都有新既領會‧‧‧真係好愛呢個故事。不過有兩個角色真係寫得極端討厭,一個慕容復加一個阿紫,慕容復竟然可以捱到最後一本才被蕭峰大罵一句〝我蕭某竟然同你這種人齊名!〞,慕容復其實一向只仗先軰既威名再加上有四個能人一個表妹,才能跟蕭峰齊名,真係好一個皇帝命。另外,其實我好想知如果倪匡唔係整盲阿紫,咁究竟金庸會點寫呢個角色呢?

黃霑,我以前細個都以為佢只不過係一個咸濕作家,因為佢同倪匡及蔡瀾做既電視節目同佢寫左本不文集。後來大個左,睇多左,就真係好佩服佢既才學,有好多所謂既才子一拍埋去,都只不過不值一哂。

細個時睇電視播天龍八部,唔知佢講乜,淨係知佢係金庸既武俠片,都覺得好好睇,最鍾意就係 Samsara 你講呢首主題曲,細個時覺得首歌好有氣勢,唱既關正傑又唱得好,可惜佢唔再唱歌。另外首插曲又係一絕。唔知 Samsara 你有冇聽過第二次個套周華健唱既主題曲,歌詞就真係就住個故事黎寫。天龍八部無記拍左兩次,覺得最搞笑既係以前做虛竹既竟然變左做喬峰。

講執著,最近馬力係一個好好既例子,臨到死前都仲係咁執著要講一大番咁既言論,可知其執著。

講人生際遇變幻莫測,琴晚才於亞視香港十大勝境入面睇余若薇談笑風生,今朝起身就見頭條係佢腦生瘤,人生就係咁。

Samsara 提到...

獅子哥哥:哈哈,慕容復真係一個笑話,金庸後期作品人物越來越立體,依d有姿態無實際既人,我地身邊都唔少啦,至緊要自己唔係其中之中囉。阿紫?聽講金庸好鍾意佢喎,AK哥哥話修書版關於阿紫有大幅改動喎,睇過會唔會好d?金庸係大男人,鍾意女人痴心。

係啦,才子才女係d名真係比人用到cheap晒,真係識寫字就係才子,識將d字拼埋一齊就係詩人,我以後都係少用依兩個terms啦。

馬力,真係...我唔會理依個係佢既真心說話定係討好中共既拍馬屁(結果拍到馬腿上)之舉,做人要講禮義廉恥,唔可以用自己三寸不爛之舌來歪曲事實。

至於余若薇,昨日新聞見佢好鎮定;又,佢講得岩喎,個瘤唔爆就無事;講真,爆左其實都應該無得救,真係驚都無用,如果果瘤可以令余小姐更珍惜生命同身邊既人,都未嚐唔係一件好事,希望余小姐勇氣充滿!

C.M. 提到...

香水姐姐:

係勒,點解你今日咁開心既,唔通... (哎呀!邊個話我卑鄙!)

Samsara 提到...

CM哥哥:你唔只d文難明,留言都好難明。