天災...人禍

七年前，當九寨溝仲未通飛時，我去過一次四川。飛機去到成都，跟住坐車經都江堰，上臥龍睇熊貓，跟住入九寨溝，再出返去成都返香港。

果次雖然係跟永安團，但係絶對係辛苦團。大部份時間都係坐車，而且山路十分難行，一有塌石就會封路，唔知幾時會通。因為團友眾多，我地由兩個導遊分別帶住坐乘兩架車，我地坐既果架車水滾而司機無留意，結果跪低左，果時雖然有手機，但係山區接收不良，一直都聯絡唔到另一班車，最後都要司機行好遠去到有電話既地方先至揾到令一架車來接我地。中間我地坐在路上足足六個鍾，夜晚到餐廳時，已經係深夜，先有得食飯。

全程既飲食，真係好差，山區資源貧乏，餐餐都係一ｄ肥肉，無青菜，更加唔會有豆腐同魚，山上雖然周圍都係係河，但係好似話因為礦物太重，根本無魚既。搞到餐餐大家爭住食既，係炒蛋，好快比人食完之後，只好食白飯。我係唯一一次返大陸會搞到無得食，亦都係唯一一次希望自己有帶罐頭囉。

四川其實在古代係好窮的，唔係乾旱就係水浸，但係戰國時李冰做既水利工程都江堰，既灌溉又防洪，即四川先至成為「水旱從人，不知饑饉，時無荒年」既天府之國咋。但係富裕既只限平原地帶，山區從古至今，都係一窮二白。


今次7.8級地震，有好多人都比喻強度有如１９７６年既唐山大地震。

在三十二年後既今天，應該同唐山大地震有進步吧！唐山大地震時因為仲係文革，真係個腦有病既四人幫為左面子，拒絕外國緩助，由得難民自生自滅，死左足足廿五萬人。好多人，本來係有得救既，我地真係曾經付出左好沉重既代價，先至去到今次有温總親自出動，中國都放下奧運既亢奮，都起碼肯承認有特大天災，解放軍出動救人。當然仲有好多問題啦，但係我地由三十二年前既草菅人命，走到今日，真係走左好長既一段路...而且仲有好長既路要走。

唐山大地震時中國政府既所作所為，反而今日聯想到今日既緬甸政府，個情形，就好似當年中國，乜有『三年自然災害』依件事嫁咩？緬甸既人民，幾時先至可以攞脫咁殘暴既高壓統治呢？


都係，行動最實際。施比受，更有福：

捐助緬甸風災:
香港紅十字會 (Hong Kong Red Cross)
聯合國兒童基金會 (UNICEF)
樂施會 (Oxfam Hong Kong)
救世軍港澳軍區 (The Salvation Army)
香港世界宣明會(Worldvision Hong Kong)

捐助四川地震:
香港紅十字會 (Hong Kong Red Cross)
聯合國兒童基金會 (UNICEF)
樂施會 (Oxfam Hong Kong)
救世軍港澳軍區 (The Salvation Army)
香港世界宣明會(Worldvision Hong Kong)