2009年3月3日 星期二

我說的其實...其實...是......

睇左村上大叔依本書,你一定會覺得,佢真係一個傻佬!

「大叔」依個名號,村上一定當之無愧。佢1949年出世,同共產黨一樣,今年已經六十歲啦!但係佢一d長者既自覺都無,仲要一把年記仲去跑馬拉松、三項鐵人,仲有人都癲既、有成一百公里既超級馬拉松!

最令人不忿既係,點解大叔塊面一d皺紋都無?點解佢將我既金句倒轉,變成:Maturity is inevitable, Wrinkle is Optional?

Well,大叔過既係超級健康既生活,除左日日有大量運動之外,仲為左跑馬拉松而戒煙,而且日日都九點訓,五點起身!名副其實既晚九朝五,由佢成為全職作家,一直堅持在依家...依個,未係因果囉。


我一向覺得作家依個自由業,如果你好似大叔既成功賣到書既,係好輕鬆既職業。你可以選擇anytime, anywhere去寫野,又可以隨時去下旅行,去吸收下新靈感,唔駛煩唔駛憂就可以賺到版稅啦,幾正!

但係,睇完大叔既書,我真係相信,除左絶小部份既超級天才,其他既作家都係辛勤如牛地每日都努力工作,先至可以寫成一本小說。而且大叔依個傻佬有一股蠻牛般既狠勁,做任何事都全力以赴,博晒命地跑,博晒命地寫。


係喎,如果唔認真既野,真係無謂做啦。人生苦短,時間精神體力心力都有限,係依寶貴既借(我其實係想講「偷」的)來的時間,何苦要做d自己唔鍾意既野?連,三心兩意,唔係好鍾意又唔係好討厭既野都無謂做啦,唔值得既。

睇完大叔既勵志書,加上肥龍哥哥既態度,我終於都的起心肝,在跑完渣打既十公里差唔多成個月之後,第一次練跑。

都話依個世界係估佢唔到嫁啦,咁耐無跑,身體養尊處優,我只係諗住好就跑3km,差起上來只跑一兩公里.......... 結果,跑多左十倍,11.5公里!

呵,我從來未試過跑超過十公里既,11.5公里係小妹有生以來跑最長既距離,其實,到底個數字係11公里定110公里都無乜所謂,最緊要係突破左自己既極限...而且,我中間全部都係跑既,一步都無走過。唯一可惜既係,我真係無諗過會跑咁多,連錶都無帶,唔知用左幾耐時間,不過,跑得開心就得啦!

今次先至聽清楚,心裏面叫囂既果一句說話,原來唔係「放棄啦!」,而係「你唔得既,你唔得既!」

唔該晒,但係,我係做得到既。跑完之後只係有d攰,膝頭有d軟,至驚嚇係差d扭唔開枝寶礦力囉;到今日,根本全身都無痛。


好明顯,一直個glass ceiling係自己既心,而唔係體能。


大叔比出來既示範,真係超級正能量YES Man!我諗,一本好書同平庸既書的分別係,一本好既書會Inspire你,帶你諗/做自己一直無試過既野。



大叔,我地一齊加油呀!


又(係,我知,依個topic真係好悶),大叔覺得唔係人人都適合長跑,所以佢從來都唔會鼓勵人地跑。這個嘛,嘿,你見我一日到黑有如傳教般hard sell就知,我並唔贊同啦,既然係好野,又點解唔同人地分享呢?而且,我只係叫人去試一次跑十公里而已,十公里依個距離,真係唔駛點練就跑到,行都行到,咁唔試下又點知喜唔喜歡呢?而且,我大把朋友都係玩過一次就唔玩,我都無再push呀!(某先生唔好對號入座,無針對性)

大叔話,適合長跑既人身體既特點係:肌肉熱身慢,但係一起動之後就可以一直運動落去;仲有,心跳慢....嗯,我仲要加埋低血壓添....真係....如果我話自己係大叔一樣既freak,會唔會係太過厚皮,在自己面上貼金呢?

3 則留言:

seikomatic 提到...

師妹,

對於一個今生只卒讀過幾本教科書,一本125頁既英文小說,未睇過金庸偽康中國四大名著十大長篇既--俺,根本無資格系呢個 topic答爹,惶論連大叔個樣都未見過。不過你提醒左一件事,就系除左facial同健身可以試做之外,仲有四叔啦,香港年青投資材俊啦,偽人、歌星、演完、耶教徒可以試做、必有另一番人生睇化。發揮潛能,為特區油。

Samsara 提到...

大師:本書在各大小書局都打入暢銷榜,書中間仲有彩頁有大叔既相,其中有一張係大叔載住手套,好塵地衝過超越馬拉松既終點....如果你睇左依100公里大叔係點跑既,你都會覺得大叔塵得有道理!

市場維京人 提到...

咦?我都開咗個 blog 關於跑步喎。得閒入嚟睇下啦:

http://runningviking.blogspot.com

Cheers!