2009年4月17日 星期五

當年....

朋友問我有冇關於管理既書介紹,佢想知幾時應該放手比下屬做,幾時應該自己處理。

關於delegation既書,有用有point既,真係一本都未睇過。反而在blog度有好多人講喎

當年我一升,中間一D gap都無,忽然就要睇成條team。仲要最慘既係,依條team係公司新近收購返來的,人事作風文化完全唔同,連workflow同電腦系統都係新的,我又要學佢地果一套,又要教佢地我果一套,自己都唔識管理之時,仲要做埋change management......

結果,當然好大鑊。今日睇返,S當日既管理質素係肥佬的,連最基本既溝通都做唔到。

S當年既公司一向自持係mnc,講數據做report,樣樣要有data support,工廠要有組織系統housekeeping,管理要scientific...新收購返來既公司,無process無documentation不掟常理出牌,要sell要有presentation甚至要求有creativity,只要你搞得岩,無人有興趣知你點做,咁你搞唔惦,亦唔會有人幫手....

S既感覺係,由打開「天幕」導彈防禦系統,一下子跌落凡間在阿富汗打巷戰。以前個個都係大學生,話頭醒尾,依家一睇,有人HKCEE全面Uncle,有人以前做開空姐,有人仲一直係店舖sales或餐廳waitress,依份係第一份寫字樓工.....因為英文能力問題,email睇唔切,回覆亦令人完全唔明白。全team人成日都做錯野,遲覆漏覆唔覆,比人投訴炸型,次次最甘既大鑊野都會去到S度。

S當年自比消防員,日日返去救火,次次衝入火場之後,都比人燒到焦頭爛額咁出來。有時,S真係會忍唔住摸下自己塊面,睇下有冇污漬,而且長期覺得自己既頭髮係樹起的。

在咁怒髮衝冠既情況之下,S對下屬既態度又點可能好?

雖然S有一個好堅守既原則:唔鬧下屬。因為,S覺得在公司潑婦罵街又或者粗口侍候,唔只無家教咁簡單,仲要於事無補,反而令office充滿怨氣同負能量!但係,唔係大聲先係鬧人既,柄人亦都唔需要粗口,S雖然自以為無表現出來,但係,成條team其實無人唔知S係睇唔起佢地的。S本來就是一個驕傲的人,同自己teammate既磨擦,真係無日無之。

嗯,當時既日子係點過既...只可以講,人既潛力係無限既囉。

直到後來出左一單超大鑊,S要同一個teammate一齊收拾賤局。感覺真係,CK老闆最憎人講既:難!好難!好難好難!

在捲起衣袖不問點解會搞成咁,只諗可以點擺平時,S先至有機會由全新角度睇返依條team。誠然,佢地英文能力,甚至有d人既表達能力都唔係幾好,但係,佢地有令人感動既工作熱誠。雖然睇email要查字查,但係佢地亦都肯學,S親眼見到依個妹妹既英文有明顯飛躍,之後同佢傾返,原來佢係靠睇S點樣寫點樣答email......果下真係好感動的,咁努力上進既女仔,你仲想點?而且,佢地果個好山寨城系統雖然比較容易出錯,但亦都有彈性好多,有一點複雜既情況,在S公司係基本會投投做唔到既,但在依度就好輕易地做到。如果你係在樹林密佈既森林入面,有高科技既GPS都無用既,反而阿黃帝據說五千年前發明既指車針會有用囉,一間公司可以在短短十年間冒起,都唔係無原因。

有依個Paradigm Shit之後,S都好想講自此之後脫胎換骨,成為人見人愛,車見車載既上司....當然無D咁好既事,S之後仲做錯好多野,衰過好多鑊;仲有時衰完又衰又衰又衰,真係好想刀仔吉大肶!

但係,依件事比S最大既體會係:要由其他人既角度來睇同一件事,你先至有可能做到野。你唔放開自我,真係試下著落人地隻鞋度,係唔可能知道發生乜事,更談不上什麼管理。

好老生常談我都知,由古至今都咁多人講未就會因為講得好岩囉,亦都因為知易行難,所以總有人不停咁講。

5 則留言:

Morca 提到...

It's Paradigm Shift, right?

Samsara 提到...

係,依個係我生命中第一個paradigm shift....

安諾勿斯 提到...

香水姐姐,你哩篇好正,小弟獲益良多!

身教真係一個最好o既coaching,小弟都想做好coaching哩part。coach人真係好有滿足感,最正係就萛個staff走o左,過o左一排都見翻,都感激你當日o既教導,真係好正。不過,而家小弟係一對十,真係分身不下。要啲兄弟做mentor,佢地闊老懶理又耍啲細,真係激死…

如果要小弟係staff o既competence同attitude揀,小弟都會揀一個attitude好冇咁有competence o既rather than一個好有competence但係attitude差o既staff。不過,哩個世界邊到有得畀你揀,attitude幾唔好都要同佢work with,真係好考EQ…

put myself in other's shoes真係知易行難,真係好有EQ先做到。比如,個staff做錯o野,搞到你畀老闆小,而你可以put myself in other's shoes,幫佢補鑊之餘,唔發老脾,自己食o左佢,真係要好高修為先可以做到。

Samsara 提到...

安先生,

我在依個paradigm shift入面最深刻既體會係,原來唔只我教佢地,佢地亦都教我。佢地教識我人人都有自己既長處的。

我一直自以為好勁,原來唔係囉,係人地忍你咋。

過到依一個shift,就唔再係高高在上在度點管理一班「靚」,而係一班人合作,做好一件事。

心態一轉,世界就會改變。

安諾勿斯 提到...

收到,如果我老闆都可以好似你咁諗,小弟就唔使成日擔驚受怕…