林妹妹出家

妙真法師於二零零七年五月十三日,因乳癌病逝.終年42歲.

就算現代科技昌明,一樣有不治之症.

世事無常,人身難得.應該點樣善用我地有限既歲月,令自己在最後一刻,可以坦然面對生死呢?

會開既花朵就有淍零既一日,有生則有死.

在歷史既長河裏面,我地不停地漂流.

在每次生死中我地不停地循環.

可能,我地不停地遇到同一班人,做同樣既事,犯同樣既錯,抱同樣既遺憾.

跟住,我地又發同樣既願,再次歸來.

開始另一回循環.

要打破宿命,

就要超越自己.

============================================

2/28/2007
在八十年代的大陸電視戲紅樓夢主演林黛玉既女星陳曉旭,証實二月廿三日在長春百國興隆寺舉行了剃度儀式，從此青燈長伴，潛心修佛．

因為家母係紅樓夢粉絲，依部在亞視轉播既長編連續劇，我當年都強迫收看左好多集．當時只覺得服飾很漂亮，眾多美女，寶玉實在太裙腳仔，林妹妹就刁蠻得聰明可愛．

之後在媽子既威迫利誘下，睇左原著．嗯，好難頂，做乜搞到好似ｄ連續劇咁戲劇化老土兼前文不對後理？無端端老太君忽然吾鍾意林妹妹，寶玉short左誤聚寶釵，黛玉含恨而終，死前遺言仲要係好女鬼地：「寶玉，寶玉，你好．．．」真係可惜了寶釵，抺黑了黛玉．

後來知道原來只有頭八十回係曹雪芹所寫，後面既全部係高鶚鼠尾續貂，咁至無咁嬲．吾知，曹雪芹既原竟到底係甚樣安排呢？

好多人話黛玉應該係淚盡而亡，咁，欠債還錢，前世欠左寶玉依個神瑛侍者既一定要還，還完未走得囉．之後先到寶釵頂硬上，嫁左比寶玉．

如果黛玉生在今時今日又如何呢？依家醫學倡明，肺癆之嘛，好易醫．以黛玉咁聰穎，如果健康既話，會吾會就好似陳曉旭咁，活得精彩而理直氣壯，無論名、利、美貌、才華、氣質、男人通通擁有，然後看破紅塵，放下過億身家同廣告王國，追求真正的和喜自在．

以陳曉旭自己既說話來講：「我曾經很專注於財富的積累，但之後發現物欲的增長並沒有給自己和家人帶來真正的快樂．」


祝願妙真法師無漏吉祥，法喜充滿．


網上新聞