灣仔趁墟

今日，第一次去灣仔有機農墟．

墟仔細細，真係有一種同周圍既高樓大夏完全吾同既純樸鄉村味道．

佢地都係本地既農民，將自己用心栽培既有機蔬菜親自攞來買．

有ｄ檔仔放左農民張相出來，而佢本人就站在個banner下面買菜．以前在日本既超級巿場會見到有ｄ農產品會放個農夫張相出來，多數ｄ農夫都笑得好開心同自豪，好似講話：「睇下ｄ菜幾咁靚！係我種出來嫁．」估吾到香港都會有．

果d菜，真係好翠綠，上面仲有少少泥添呀，好明顯係今朝先摘既，好新鮮呀．

佢地在幫你磅菜之前，一定會順手摘走ｄ無咁靚既葉，緊係啦，依ｄ係佢地引以為榮既產品，一定要以最佳面貌到客人手中．佢地除左有好開心同簡樸既笑容奉送之外，磅完之後，又多數比多兩條菜過你．

果度無人用新膠袋，都係循環再用ｄ百佳，惠康膠袋，所以，都係自備購物袋啦．

有個婆婆仲得意，我地擺左ｄ菜在個磅度，佢望左一輪，攞左個天平秤出來，話：「我好蠢嫁，學極都吾識用ｄ磅，只係識用依ｄ古老秤．我個女就識用，不過去左買飯．」

哇，婆婆你一ｄ都吾蠢，d只有刻度既天平秤都識用，比我就真係吾識就真．不過，我都特別小心check下婆婆有冇找多左錢．

價錢，就係貴ｄ嫁啦，有機耕種既成本好貴嫁．比如果ｄ有機黃豆肥，就貴過化肥五六倍，又因為吾落殺蟲劑，要多ｄ人手來人工除蟲嫁．大既$16-20一斤．種類有羅馬生菜，西生菜，橄欖菜，白蘿蔔，油墨菜，西芹，紅菜頭．．．

特別推薦車厘茄，有機車厘茄真係好好好好好味！飽滿多汁，仲有好濃郁既番茄味，原來真正既番茄係咁既味既，好香呀．

依個墟馮星期日在灣仔稅務大樓旁既灣仔告士打道花園，時間由11:00 am- 5:00 pm．本來賣埋下個禮拜就完嫁啦，不過依家延長到今年年底．

得閒就去幫襯下啦，健康好味，又有人情味！