2007年8月6日 星期一

快樂多角度(8) - 永不抱怨

正能量超新星On Dog哥哥post左一段超級正能量影片,比我依d一集洛奇都無睇過既人都可以义义電。

而我深刻既一段說話,唔係洛奇比人quote完又quote既:「等我話比你知你一早已經知道既野,人生唔係只有陽光同彩虹,依個係一個好險惡無情既世界,無論你幾咁tough都好,如果你放棄,佢就會打到你跪在地永遠都爬唔返起身。人生既打擊比任何人更重手,但最重要既唔係你可以出手幾重,而係你有幾捱得打兼仲可以繼續前進,係你究竟可以哽到幾多打擊而都繼續前進,咁樣先可以嬴!」

我最深刻既反而係洛奇個仔果d怨天怨地既說話:怨老豆太出名,怨自己永遠活在老豆既陰影下,怨洛奇如果比賽輸左會連累佢都跟住出丑...真係典型既LOSER。

洛奇話個仔既說話好岩:「你由得人地指著你塊面,閙你没用,當你遇到困難既時候,就開始周圍揾野來賴。」

「如果你知道自己既價值,咁就去爭取你應得既野,但係你首先要願意承受打擊,而唔係周圍手指指,話你今日搞成咁都係因為依個、果個或者是但邊個人!只有懦夫先會咁做,而你唔係懦夫。」

如果要開心既話,好重要既一點係要承擔責任,清楚自己既今時今日既問題,都係自己一手做出來。而唔係有乜事都賴左人先;亦都唔係諗到無人好賴,就轉移視線賴社會、政府、經濟轉型、教育制度又或者皇后碼頭就來要拆;更加唔好問埋曬D無謂問題:點解我老豆唔係李嘉誠?點解我唔係徐子祺?點解我唔係文萊國皇?點解天要下雨?(依個係講我。)

抱怨唔單止產生強烈怨念同負能量,仲會令自己永遠都唔敢正視問題既癥結所在;連問題既真正厡因都面對唔到,咁又點可能解決佢?

所以,真係永遠永遠永遠永遠永遠永遠永遠永遠永遠永遠永遠永遠永遠永遠唔好抱怨

風水佬呃你十年八年,但係,只要你留心自己既思想,停止抱怨兩個星期,包你既生命會發生轉變,仲會因為自己終於承擔起問題既責任而為自己而自豪,人亦會變得開心。

試吓丫!


又,On Dog哥哥,不過唔明藍天理論果部份喎。我只聽過話今年夏天咁藍天,係因為吹南風咋喎,可唔可以解釋下?

12 則留言:

匿名 提到...

Sam姐: 妳譯得好正播! 續STEVE JOBS之後又一佳作!

"藍天理論"其實小9係聽番黎, 並未明大意, 我都要搵搵AK兄幫忙先...

匿名 提到...

香港地就係愈來愈多賴呢賴路

窮就賴無野做,無野做就賴住得遠,住得遠就賴窮...

seikomatic 提到...

Sam 師妹,

「人生既打擊比任何人更重手,但最重要既唔係你可以出手幾重,而係你有幾捱得打兼仲可以繼續前進,係你究竟可以哽到幾多打擊而都繼續前進,咁樣先可以嬴!」

俺唔苟同Rocky 果種【將抱怨(悲奮)化為力量】,堅信自已,頂硬上,堅持頂出一片天,終於可以打出自已的空間的信念。

力與反助力的理論,施力越大,反抗越大。頂硬上,你條命硬定系事情硬淨?頂只會消磨你的意志同精力。但鬼佬就系喜歡呢庭遇強越強既對抗態度,希望自已長命過對方。

咁怨都唔得咩?

得,但系要適可而止。蠢下屬與橫蠻既老細,一切不如意既事情系客觀既,當然令人好frustrate,抱怨好自然,俺試過病榻上放聲嚎叫呻吟,果然舒服好多。

怨從那裡來,就從那裡去。

怨由心生,就順心入手,改變一下心境:既然世事無常,好事無常,壞事都系無常。衰老細用同理心去理解佢的處境,闡明你的處境,如果佢仲系明頑不靈,佢唔自動消失,咁即系話你自已要消失。蠢下屬用寬大心去教導佢,或者愉快心抄左佢。

抱怨懷才不遇,時不與我,因為你還站在自已的 ego 上面,退下來一原來天下海、湖、江、碗里面既水皆平等。

改變可以改變既事情(去貪嗔痴),接受唔可以改變既事情(無常無我,老病死別離),改變自已的心態,就根本唔會抱怨。

seikomatic 提到...

境隨意遷。

K 提到...

睇o左你前一篇"知足"同埋呢篇, 我係時候回應啦~

曾經有人唔同意要知足, 當然, 人的wants是無盡的, 但當得到所得的東西, 就自然想追求更高一個層次(such as Maslow's hierarchy of needs) 追到的固然想繼續追, 但追唔到係咪要強求呢? 退一步, 或者其實fulfill到最低的needs, 又或者得到的就收手, 比起不斷地無了期的追求(之餘仲要搞到唔開心), 人會比較快樂和寬容一點。

"怨從那裡來,就從那裡去。怨由心生,就順心入手,改變一下心境:既然世事無常,好事無常,壞事都系無常。" 大師所言甚是。

如果怨係可以解決問題, 大家就只會一味怨而唔做任何事。但又有無留意, 自己抱怨的樣子會較樂觀(開心d)的樣子難看嗎?

"承擔責任,清楚自己既今時今日既問題,都係自己一手做出來", 太多人愛逃避, 最終會苦了自己和別人。

換個心境去看待問題, 可能會想到可行的辦法去解決。

謝謝Samsara和大師的sharing, 所以我最終可以走出藩籬。

匿名 提到...

Samsara姐姐,

ak近日瘋狂煲舊片...其中...

「神經俠侶」:未來是屬於勇敢的人...

K 提到...

ak:

無記在7月27日播了「神經俠侶」, 套戲有意思, 抵攞當年金紫荊獎"最佳編劇"!

Samsara 提到...

On Dog哥哥:龍哥都已經六十幾歲,都咁好火,聽到我譯都譯得火d。龍哥係得既!

數怪哥哥:其實我以前都係姓賴既,成日覺得我咁好,梗係人地既錯啦。到我真正醒覺時,先明白原來係倒轉,一直都係自己做成。以前如果有人同我咁講,我一定當耳邊風,每個人都處於唔同階段,希望我依篇可以令人少少地諗吓自我問責。

大師:境隨意遷...Bravo!我真係好鬼鍾意你呀,我都會忍唔住sun同問做乜天要下雨,但係發生一切既事,都真係有d原因。

我既正能量偶像話:「我們來到這個世界是為了學嘢,而世界就是我們的老師 - 當我們學不識一樣嘢時,我們會留班再學一次...又再一次,直至我們學識之後就會轉去第二班,而且不用擔心,課程永遠陸續有來。」

如果識得咁諗,就真係唔會抱怨。

Karen妹妹:見到妳可以走出藩籬,真係可喜可賀!做到依樣,真係好唔容易,妳真係應該為自己而自豪。

AK哥哥:神經俠侶我睇左少少,嗯,真係要有好大勇氣先可以承認一切都係自己做成。

匿名 提到...

謝謝你一大清早就給我補充大量正能量(怕且夠幾日用) :>

C.M. 提到...

呢幾篇快樂多角度,最喜歡的,就是呢篇。

其他如“知足”、“Paradigm Shift”等等,雖然理性上明白,但未嘗試過/感受到。不過不抱怨,就應該OK勒。

>>改變自已的心態,就根本唔會抱怨。

嗯。

C.D 提到...

Samsara,原來我地真係唔使戒晒唔飲咖啡架!hehe~

你睇下!
http://hk.news.yahoo.com/070807/3/2d2r7.html

YEAH~

D.

Samsara 提到...

Dareka:學On Dog哥哥既咒語---正能量正能量正能量正能量。

CM哥哥:ok,唔該兩個禮拜後返來覆診,報告進度。

阿D:關於咖啡既硏究太多啦,而且個個結果都唔同,我會飲少d囉,唔會全戒。我覺得weekend去靜靜地既cafe,飲杯咖啡,食件cake,睇下書,寫下野,真係好幸福既事。

雖然我連weekday都飲咖啡...