可能．．．

我以前好討厭在街上拉你出信用卡呀上寛頻既Sales，覺得佢地真係好糾纏，仲試過一次有個Sales係我向左邊行，佢就tun去左邊阻住，我向右邊行呢，佢又向tun去右邊阻住．．．喂，好狗不欄路喎，係咪學小學生玩先，所以我對依d Sales，永遠係不瞅不睬，黑口黑面。

但係有一次剪頭髮時翻八掛雜誌，睇左一篇關於電話Sales既報導，話如果d Sales交唔到數，會被罰留到三更半夜，然後一直比Leader閙到夠先可以收工，第二朝晨早要返工再Sales過，再交唔到數，咁就會比人調去ｄ無乜人流既地區，更加永遠無得翻身。

咁X周刊當然無人信到足啦，但係d Sales真係風吹雨打咁在空氣污染指數極高既街頭，不停講同一翻說話，不停地拉客，揾既都係辛苦錢來嫁。

＝＝＝＝＝＝＝＝＝＝＝＝＝＝＝＝＝＝＝＝＝＝＝＝

我以前好討厭大熱天時ｄ男士身上既可怕臭氣，天，如果日日有沖涼換衫既話，係無可能發出依種酸酸叔叔既味道。我個鼻好靈，我對依ｄ怪味既反應比其他人大好多，點解在香港咁炎熱既地方，佢地唔可以注重一下個人衛生呢？

但係有一次睇唔知鏗鏘集定星期ｘ檔案，訪問一個在內地結婚既男士，佢為左慳錢，在香港無地方住，工作完之後只係去文化中心外面既海傍露宿。到周未返內地既屋企時，先可以沖涼同有覺好訓，為左養妻活兒，有人真係可以好克苦。

＝＝＝＝＝＝＝＝＝＝＝＝＝＝＝＝＝＝＝＝＝＝＝＝

我以前好討厭ｄ人去快餐店買野吃時，左諗右諗，問依樣果樣。快餐來來去去都係果幾個set，餐飲只有果幾種，仲要慢慢諗慢慢揀？條龍好長嫁啦。

但係在沙士前後睇左個訪問，有個男士失婚失業，一個人帶住個八九歲既女好慳儉地過活。一次女女話好想食雲吞麵，佢攞晒身上既所有銀仔，揍夠十元，帶個女去吃十元雲吞麵。比錢時收銀見到佢一個大男人竟然攞出一大堆毫子來比十元，比佢白眼不突只，仲拒絕收佢依堆毫子。唔同真係要一文錢迫死好漢？

＝＝＝＝＝＝＝＝＝＝＝＝＝＝＝＝＝＝＝＝＝＝＝＝


我以前推完門之後，從來都唔會幫後面既人扶住度門，都無乜人咁做，我又駛乜扶門咁麻煩又浪費時間呢？


直至有一次，行在前面既人無扶住度門，度門又關得好重、好快，我一下子縮唔切，撞到手。撞完即刻瘀左，仲扭親。原來如果唔幫人扶門，等於在人面前bam埋度門；原來，可以撞到人。

咁，開門時咪望下後面有冇人囉，習慣都係慢慢養成。

＝＝＝＝＝＝＝＝＝＝＝＝＝＝＝＝＝＝＝＝＝＝＝＝
後記：

AK哥哥話：

寒天飲凍水，冷暖在心頭。

大師話：

夏天座地鐵，熱凍羅自知。


娃哈哈！