2007年9月11日 星期二

可能...

我以前好討厭在街上拉你出信用卡呀上寛頻既Sales,覺得佢地真係好糾纏,仲試過一次有個Sales係我向左邊行,佢就tun去左邊阻住,我向右邊行呢,佢又向tun去右邊阻住...喂,好狗不欄路喎,係咪學小學生玩先,所以我對依d Sales,永遠係不瞅不睬,黑口黑面。

但係有一次剪頭髮時翻八掛雜誌,睇左一篇關於電話Sales既報導,話如果d Sales交唔到數,會被罰留到三更半夜,然後一直比Leader閙到夠先可以收工,第二朝晨早要返工再Sales過,再交唔到數,咁就會比人調去d無乜人流既地區,更加永遠無得翻身。

咁X周刊當然無人信到足啦,但係d Sales真係風吹雨打咁在空氣污染指數極高既街頭,不停講同一翻說話,不停地拉客,揾既都係辛苦錢來嫁。

========================

我以前好討厭大熱天時d男士身上既可怕臭氣,天,如果日日有沖涼換衫既話,係無可能發出依種酸酸叔叔既味道。我個鼻好靈,我對依d怪味既反應比其他人大好多,點解在香港咁炎熱既地方,佢地唔可以注重一下個人衛生呢?

但係有一次睇唔知鏗鏘集定星期x檔案,訪問一個在內地結婚既男士,佢為左慳錢,在香港無地方住,工作完之後只係去文化中心外面既海傍露宿。到周未返內地既屋企時,先可以沖涼同有覺好訓,為左養妻活兒,有人真係可以好克苦。

========================

我以前好討厭d人去快餐店買野吃時,左諗右諗,問依樣果樣。快餐來來去去都係果幾個set,餐飲只有果幾種,仲要慢慢諗慢慢揀?條龍好長嫁啦。

但係在沙士前後睇左個訪問,有個男士失婚失業,一個人帶住個八九歲既女好慳儉地過活。一次女女話好想食雲吞麵,佢攞晒身上既所有銀仔,揍夠十元,帶個女去吃十元雲吞麵。比錢時收銀見到佢一個大男人竟然攞出一大堆毫子來比十元,比佢白眼不突只,仲拒絕收佢依堆毫子。唔同真係要一文錢迫死好漢?

========================


我以前推完門之後,從來都唔會幫後面既人扶住度門,都無乜人咁做,我又駛乜扶門咁麻煩又浪費時間呢?


直至有一次,行在前面既人無扶住度門,度門又關得好重、好快,我一下子縮唔切,撞到手。撞完即刻瘀左,仲扭親。原來如果唔幫人扶門,等於在人面前bam埋度門;原來,可以撞到人。

咁,開門時咪望下後面有冇人囉,習慣都係慢慢養成。

========================
後記:

AK哥哥話:

寒天飲凍水,冷暖在心頭。

大師話:

夏天座地鐵,熱凍羅自知。


娃哈哈!

19 則留言:

野蠻郡主 提到...

對,每樣事情總有不為人知的一面!

我都會推門禁lift架,我仲覺得…男仔如果肯開門等女仔或者人地行埋先仲好有風度既表現,值得加分!

匿名 提到...

如瞎子摸象, 大家都對, 但大家都只體會到十足的一小部份而錯!

不過, 又無所謂對與錯, 一切, 只在人心.

人心好惡, 又無常, 一切, 只在己念.

一念天堂, 一啖砂糖...

匿名 提到...

Samsara姐姐,
凡事背後,總有成因...每一個選擇既後面,都係一大揪既計算...其中又隱藏左幾多不為人知既理由...無窮無盡既可能...

寒天飲凍水,冷暖在心頭...

人家有體諒之心,願意伸出援手推一推門把,很好...人家不懂/不願體諒,也沒有法子...

我還是繼續走自己的路...

Samsara 提到...

郡主妹妹:真係乖!女士都一樣要有風度。

On Dog哥哥:我在度諗,人人都用佢自己既角度來睇世界,所以世界好平面。如果我d可以多d角度多d幻想力,依個世界又會好唔同。

真係一念天堂。

AK哥哥:你講得咁複雜既?唔係樣樣野都有咁多計算既我諗,有時d人真係志在開心又或者發神經。

哇,做乜咁感懷身世呀?仲要孤身走我路添,依個係擇善固執?

不過都係固執嫁啦。

學 霖 山 莊 提到...

七年前嘅中午, 我在葵芳廣場的快餐店上,
親眼目睹一個,
我有理由相信喺正常的男人,
等待、並進食別人餘下的午膳...

到今天我內心依然很難過...
我們活在的,可是同一個社會啊!

變幻原是永恒 提到...

吃人地的餐, 在4-5年前都見過..唉...
社會低下階層永遠多辛酸故事, 但當中有的係自己攞來. 古人云, 修好身先至齊家..否則麻煩多多..

火鶴 提到...

sara, 我呢邊所有人無論男女任何種族都會扶門, 上次返香港時遇到D唔扶門嘅港男, 我幾想一腳撐番開道門撞佢獲金呀! 無風度丫嗱.

匿名 提到...

近來常到廣州工作。

地鐵內的乘客很樂意讓坐給其他老弱及孕婦。風氣很好。

廣州同胞在地鐵內特別好。

王老五

匿名 提到...

Samsara 姐姐,

你講個類 sales 我都冇遇過,不過就遇過 D sale 保險既女仔,而家好興著哂成套 suit 企街攔路個隻呢。個人就覺得好討厭囉,保險其實係需要好多專業知識,唔係著左套 suit 就等如你夠專業架,你估真係師公會咩。一睇你班真係好似岩岩讀完中五既學生妹,化行妝,企係條街度淨係截男人問長問短,好核突囉,而家香港淨係男人要買保險咩?你究竟係賣保險定係保險套呀?唉‧‧‧香港係咪真係咁唔掂呢?

*****

汗味‧‧‧身為男人我都好怕‧‧‧頂唔順‧‧‧嘔‧‧‧

*****

我好鍾意星期日聽香港電台張永霖個節目,佢每次都同人講唔好立亂買股票,唔好投機,因為錢係好難搵既,輸錢係好容易,贏錢係好難。所以我相信去快餐店左諗右諗既都係為左要將個滿足度最大化,所以先至諗咁耐既啫。

其實香港人由細到大都受慣呢種白眼,我細個時都受唔少。不過個間雲吞麵鋪自己都係做十蚊雲吞麵之嘛‧‧‧憑乜野俾白眼人睇呀,而家人地又唔係俾唔起錢黎你度乞黎你度食霸王餐,咁叻賣三十蚊碗丫,笨。

*****

扶門呢樣野我好耐以前都冇做,我都唔記得左係幾時開始有扶門俾後面既人,不過我都只係扶一扶既啫,冇可能長時間係度扶住度門等所有人入哂先放手既,因為唔知幾時先至入哂架嘛,但係我覺得都係好小既事啫,可能因為自己都係做緊服務性行業喇,所以唔覺得幫人扶一扶住度門係乜野一回事。

不過講開呢樣野呢,又令我諗起另一樣野喎。女人我唔知喇,我發覺好多男人去完洗手間唔係唔沖水,而係要用隻腳去踩個水箱上面個制喎,我都唔知為乜?如果你係嫌個制可能污糟既,咪唔好沖囉,又要懶好心去沖水,但係又要用腳去踩,咁個制唔污糟都變污糟喇。另外,沖水呢個動作係你去完廁所之後先做既,我估你隻手比個制仲污糟喇,就算你隻手比個制乾淨 D,唔通你去完廁所係唔洗手既?上至公司董事,下至普通尋常巿民,我真係諗唔明點解囉‧‧‧

seikomatic 提到...

Sam 師妹,

俺媽舊屋村每部電梯只停三層,幾十年一般街坊入 lift會禁晒三層,甚至如果 lift里面只有你同街坊兩個人。

幾年前俺開始引入/ 示範 入 lift只禁自已果層,因為覺得層層停晒時間晒電。而家俺發覺真系有人有樣學樣外,但已前禁住開門個制都無人肯做,咁系咪俺做錯呢?
________________
幾廿年前系U個瓊天都見過人用牙簽督人食淨果D送尾,原因?
__________________________
每份工作都有它的難處,你無咩?懂得理解系有同理心=EQ,不過亦唔需要太易動情。

咁派傳單既派唔完無得收工,但俺覺得唔鼓勵唔環保,所而唔會因為幫佢派完就收,反而想大家唔收就等佢淘汰。
__________________________________
上聯:

寒天飲凍水,冷暖在心頭...

下聯:

夏天座地鐵,熱凍羅自知。

惡女 提到...

Samsara,好呀,呢篇寫得好!on dog都講得好!我們總以為自己看得真,其實不然,故事背後總有故事,一切在乎我們的心。

認同X 100

Samsara 提到...

學霖哥哥:我又無真係親眼見過有人吃人地d餐,但係,可以點算呢?佢地唔係在孟加拉或者係非洲喎,點解可以差咁遠?

永恆哥哥:我又睇過另一個訪問,有個男人九七年買樓做左負資產,最後比銀行趕左出來,帶住個仔無錢過年,佢係靠有個中心比左一箱罐頭比佢先過到年。你有冇睇過【天水圍十二師奶】呀?窮都有好多原因。

火大俠:之前讀者文集造過個全球禮貌調查,結果係香港人又唔扶門又唔肯幫人執野。最搞笑係有人既反應係:唔幫人扶門唔代表無禮貌!

你估個個都係發哥大聲講野唔代表無禮貌咩?公民教育呀,公民教育。

王哥哥:廣州地鐵有人讓座?真係好,有時見到d人好主動咁讓位比老人家,都真係幾人間有情嫁。

獅子哥哥:保險都要攔路,有用嫁咩?

嗯,如果係老人家既話我就會扶門到佢行晒為止,如果返工時大家都有黙契要自己扶返。不過有時d人係會寧願行快兩步避度門都唔肯高抬貴手扶下既,以前我會心諗有冇搞錯,不過依家我係會幫佢扶既,費時計較。

股票識喎,只知股票同蘋果一樣,會跌落來,你係比佢打親定係可以執來醫肚,就睇自己造化啦。

睇十蚊雲吞時,我在西環返工,都成日會去十蚊雲吞鋪食野,有一間d雲吞好大粒嫁,真係唔知佢點圍皮。又,十蚊店其實係經濟不景既象徵,在銅鑼灣金百利地庫果間十蚊店終於執笠時我真係好開心,果個係人流勁旺既鋪位,係唔應該有十蚊店既。十蚊店絶對係經濟領先指數,金百利間十蚊店執左無耐,香港終於都返到去

用腳踩沖水制?係咪當自己踼波?駛唔駛咁無公德心呢又?女仔比較難d,特別果日佢著三寸斗零踭加窄身裙既話。

大師:我住果度好老化,已經無乜細路仔,又有多老人家,真係要扶門按lift先得。在U既瓊天?真係估唔到喎。你覺得我濫情?其實唔係,我只係天生心腸硬,後天發現自己原來好可惡。我份工當然有難處啦,但係有時講真,當我在7-11揀緊要寶礦力定Perrier時,都忍唔住諗有人要日日行幾個鍾去攞水,仲要d水唔乾淨,又或者依個已經係d低收入家庭既一人份量買餸錢囉,十蚊一餐餸,既係佢地都無錢吃下生果,仲要豬牛羊樣樣都加價,雖然吃菜仲有益。我只不過係好彩有一d marketable既技術可以提供,雖然我覺得d人可以煮到一手好菜同搞到地方乾乾淨淨好厲害,但係巿塲話依d技術係低價值喎,所以佢地就只好捱驢仔。何況,巿塲瞬息萬變,今日有價值既野聽日可以一文不值。我唔係想養懶人,但係唔好真係比我見到朱門酒肉臭囉。

大師,我真係好鬼鍾意你。

Samsara 提到...

惡妹妹:你係記者就應該見得仲多啦,但係會唔會開始麻木、又或者無力感太大呢?

匿名 提到...

Samsara 姐姐,

賣保險個 D 妹妹仔,真係好似你咁講架,你行左佢 tun 左,你行右佢 tun 右,好乞人憎囉,係旺角已經人多架喇,仲要係度攔路。至於有用冇用,只在乎於佢地既上邊點睇既啫。

另外睇到你寫朱門酒肉臭,令我好感慨。而家做緊呢間公司係上巿公司,呢度都經常見到朱門酒肉臭,路有凍死骨呢個情況。

安諾勿斯 提到...

呢篇真係正,爭d走o左寶。每個人背後都有自己o既故事,有自己o既價值觀。多d包容,小d爭拗。多d設身處地為人地諗下,社會都和諧d。

Samsara 提到...

獅子哥哥:唉,我依家對d攔路哥哥都好d嫁啦,揾食姐。

係啦,點解可以差得咁遠呢?如果將富國唔要浪費左既食物送比窮國,咁就應該無人要挨餓,大家都係人姐。

匿名哥哥:你個名真搞笑。多謝你唔賺我老土長氣悶仲讚我,真感動。

變幻原是永恒 提到...

香水妹妹,

貧窮的原因很多, 自己都係貧窮出, 你上面所說的電訊sales我7,8年前都做過~, 的確很難做~

我只係覺得好多人都喜歡死充, 不理自己的負擔能力, 一旦逆境就馬上仆街..

上一輩就話無文化無計..但依家....

火鶴 提到...

sara,

「我唔____唔代表我無禮貌.」

呢句嘅禍害, 就好似聞鴿咁, 令個社會倒退廿年.

sara, 借少少位我會一會另一隻獅子好嗎?

獅子皇,

扶門呢, 如果人人都做, 咁每個人都只係扶俾後面果個啫, 順手一扶, 絕對唔嘥時間.

保險攔路妹妹呢, 佢哋只係氹你座低, 座低後就有D senior經紀同你講.

Samsara 提到...

永恆哥哥:贊成!睇下天水圍十二師奶呀,點解d女人可以咁堅強硬淨?就係因為個男人有少少失敗唔如意就投降,自暴自棄日日落街捉棋既又有,攞晒d錢著草又有。結果,女人要撐起整個天。

仲有,依篇:http://learningforest.blogspot.com/2007/02/blog-post_25.html

火大俠:聞鴿咁跨?扶門講得好。