依幾篇文，應該有好多網友都已經睇過，我都唔知點解我咁後知後覺，成個月之後先見到：
扎鐵英雄傳 I*
扎鐵英雄傳 II
扎鐵英雄傳 III
第一篇圖文並茂，真係十分之正，一定要睇。
原來一條鋼根就有 120 kg，即係240包米咁重，就算兩個人一齊開鐵，都真係好大既體力工作。
原來扎鐵工人已經咁老化，平均都四十尾．．．點解有一位英雄都已經六十二都仲做緊咁粗重既工作？
同場加映：只矢一家 (一個關於混凝土的兜亂討論)
仲有：
I teach you how to flirt a girl in a “construction” way
I teach you how to flirt a girl in a “book” way
Good Think Vomit.
Blog Slice Real Yes Crouching Tiger Hidden Dragon!
5 則留言:
哈哈哈‧‧‧竟然 post 左成日都冇人插過，第一個，插左先再講。
Samsara 姐姐，
細個時聽聞做紮鐵日薪有成五百蚊，好正喎‧‧‧細個時已經係廿幾年前既事喎，唔係十年八年前，相對呢廿年既通脹‧‧‧
以前冇去過地盤就覺得係地盤做雜工都有成三四百蚊日，好高人工喎，雜工既工作做乜架？係地盤執頭執尾清泥頭垃圾囉‧‧‧嘩‧‧‧咁好過去執紙皮汽水罐丫‧‧‧
當一切都未親身經歷過既時候，嗯‧‧‧做地盤都唔差丫，只係做 D 手板眼見既野都咁高人工‧‧‧
紮鐵‧‧‧係地盤既天面同地面屈紮鋼筋，好天既時候係一路做一路曝曬，兼且仲要沙塵滾滾，又唔係月薪，做一日有一日，落雨天又冇工開。曾經有一次大樓平頂，跟人上天面拜神，嘩‧‧‧個種熱法，如果身體機能同體能唔夠，真係會死人架‧‧‧廿幾年前五百蚊日？今時今日八百五十蚊日？
又，40mm 直徑 120 公斤重一支既鋼筋，好似叫 Y40，唔知我有冇講錯，有錯請指正。唔記得話係一呎定一米既 Y40 已經唔係一個普通人拎得起。不如拎黎做健身既啞玲丫‧‧‧
雜工‧‧‧成個地盤沙塵滾滾，叫你係度曝曬吸塵執垃圾清泥頭‧‧‧俾三四百蚊日你？
又，一架運石屎既車仔，唔係田螺車呀拿‧‧‧係地盤運小量石屎既車仔，唔好講笑，原來係好重架，唔載石屎空車時我都只係僅僅夠力拎起，載埋石屎恐怕就拎唔起囉‧‧‧
搭棚‧‧‧唔駛多講‧‧‧有冇畏高先？
又，都係跟人上天面拜神個次，搭所謂既工人 lift，嘩‧‧‧救命呀，好恐怖呀，除左話自己有畏高之外，實際上都好得人驚呀。
從此‧‧‧原來讀多 D 書真係好緊要架‧‧‧並唔係睇唔起地盤工人，而係知道地盤錢並唔係想像中咁易搵。
從此‧‧‧原來地盤錢除左唔易搵之外，唔係話你想搵，你肯做就可以做到架，地盤錢唔係人人都賺到架。
從此‧‧‧原來呢個世界存在好多好多既剝削同黑暗。
從此‧‧‧非常尊敬做地盤既勞動工人。
獅子哥哥:
之前我有個朋友講佢一個經歷，佢在數碼港返工，有一日早收工撘過海巴。數港港未起緊好多豪宅既，果時大熱天時，咁岩地盤放工，成車都係收工返屋企既工人。
在密封既冷氣巴入面，佢走又走唔到，坐在邊都一樣，聞到非常強勁既汗味．．．
當時我笑到透唔到氣，雖然我話比著佢晒成日都一定係咸魚咁味，但係依個情況又真係勁搞笑，我果時只係諗好彩唔係我遇到。
到今次工潮再加上５０１既文章，我笑唔出lu。
以前睇一個記錄片，攞古斯巴達人奴隸既手臂骨出來硏究，見到臂骨有一固C形既凹位。原來係因為奴隸生前長處做粗重既體力勞動，二頭肌（既係大隻佬既老鼠仔）長期磨損臂骨，搞到連骨都磨損。。。
唔知依ｄ扎鐵英雄既臂骨會唔會有磨損？
睇左妳篇「可能...」
原來妳以前都幾....咩架喎.
Gavin哥哥:
其實，依家都幾...咩嫁。
張貼留言