色戒

七十講色戒，也來湊熱鬧。

唔好意思，以下有講全盤內容，篇小說好短嫁咋，不如自己睇左原文先。

又，小說改編成電影既話，我會揀睇左小說先。小說有更多想像空間，特別依篇篇幅咁短、又多留白，李安可以有好多個人發揮。

＝＝＝＝＝＝＝＝＝＝＝＝＝＝＝＝＝＝＝＝

我終於都睇左色戒啦，之前一直都無睇過依一篇。

其實唔錯喎我覺得，同埋我明白點解李安要拍依個故事，依一篇真係好有電影感，有好多非常正既影像同鏡頭。

比如「麻將枱上面一只只鑽戒光芒四射」、「土黃厚呢窗帘，上面印有特大的磚紅鳳尾草圖案，一根根橫斜著也有一人高」、「左首牆上挂著長短不齊兩只鏡子，鏡面畫著五彩花鳥，金字題款」，真係好色彩斑斕！

最搞笑呢，就係ｄ女人既衣著打扮，竟然用金鏈來造黑呢斗篷既紐扣！！！仲要戴三五七卡既鑽戒來打麻雀，鑽戒同麻雀鬥大粒，再開大光燈來鬥閃．．．真係港女都比下去。

易先生令人討厭嗎？嗯，一個殺人放火既軍官會對間諜有幾仁慈呢？就算佢係美人、就算係最後一刻救左佢。講來講去，都係王佳芝竟然愛上依個易先生，真係千年道行一朝喪，依個明明不過係純肉體關係。張愛玲筆下既男人係咁嫁啦，唔會激起你討厭佢地，討厭都仲算係一個有温度既情緒；玲玲寫既男人，會令人打從心底裏睇唔起佢。

好想睇梁朝偉點樣演果個救佢一命既憐惜表情啊！但係上次偉仔在傷城演得太過火啦，佢可能可以演ｄ少少壞比較曳既男人，唔太能夠演真正鐵石心腸既無毒不丈夫囉。今次，睇下點。

依個係張愛玲同胡蘭成既故事？？？哈哈，玲玲太高傲啦，你永遠唔會見到佢走出來潑婦罵街呼天搶地哭個死去活來，佢連控訴都不屑。玲玲就算傷心頂透，都只會好似梅麗史翠普在穿Prada的惡魔咁，躲起來自憐自傷。

嗯，我真係滿腦影像，好期待依部戲啊！