2008年5月12日 星期一

脾氣

小妹不得不承認既係,本人實在係十分之燥底。因為病情嚴重,久病成醫,所以對治脾氣依家野,真係收集左唔少原因方法,在佛誕之日列出來,一來懺悔,二來提醒自己有咁鬼多方法對治就唔該唔好再犯。


點解會發脾氣呢,好多時係逃避自己不願承認既情緒/事實既方法。一係因為Ego受傷,為免感到痛楚所以先下手為強,進攻左前;另一個係因為自己恐懼,但為左divert自己,就發左脾氣先,情況就有如野獸受驚時,就係佢地攻擊性最強、最惡既時候。

脾氣仲係會上癮既,凡會上癮既壞習慣(比如嫖賭喝炊),自有其強力吸引之處。而脾氣之所以吸引,係因為發脾氣會令人覺得自己好Powerful,可以操控你發脾氣既人,滿足自己既Control Freak;因為自己想要控制一切事情,所有當天要下雨、塞車、前面個阿婆行得慢阻住你條路...更小既事,都可以令你發脾氣。脾氣仲會令心跳加速,血壓上升,令自己覺得Lively,十分有快感,所以吸引人一次又一次地發脾氣。有時呢,我甚至懷疑發脾四其實係為左證明自己仲活著。

如果唔控制脾氣,發脾氣係會養成習慣既,而倒轉來講,如果養成心平氣和既習慣,亦可以寛厚待人。習慣既可養成,就可以改。我地可以選擇唔做習慣既奴隸。


咁有脾氣時又點算呢?慈悲同脾氣係兩個完全相反既情緒,勢不兩立。所以只要慈心一生起,脾氣自然消失得無影無踪。

咁,點可以有慈悲心呢?個人體驗最有效既方法係提醒自己,無論一個人表面上睇來幾強悍或邪惡,骨子裏,其實都只係凡人,一樣會覺得痛,內心充滿不安,渴望別人重視,渴望別人無條件既接受。生老病死無人躲得過,仲有比如怨憎會、愛別離、求不得等等既苦楚人人都有,睇表面有人好似乜都有,但係佢實際上既生活,真係如人飲水,冷暖自知。活在世上本來就唔容易,又何不對人好d?有時候,打生打死,其實都只係為左一句好說話,一個贊同既眼神。

而仲有一招呢,係應該只針對事,而不針對人。比如有兩個小朋友倒瀉野,媽媽A講:「你真係一個笨蛋!」,而另媽媽B就講:「你真係做左件蠢事!」

依兩句說話既分別就大囉。

媽媽B只針對小朋友既依個錯來講,只對事,並唔係好似媽媽B咁,因為小朋友既一件錯事而人身攻擊,釘死佢做笨蛋。如果我地一直記得依個分別,只針對事而不針對人,就唔會輕易地評價別人。

如果我地真係好誠實地問自己,我到底有冇做過一d壞事蠢事?個答案係乜野呢?...唔該老實d...好多錯事呀哩,你可能仲有十萬個原因解釋添,既然自己做錯事有千萬個理由,人地未又一樣係咁,點解唔可以原諒人別呢?

人呢,其實分分秒秒在變,今日既千古罪人,難保下一刻就會放下屠刀,立地成佛。

Ajahn Brahm曾經講過:

There is no idiot; it is just a person who did stupid things.

There is no terrorist; it is just a person who did terrorizing things.

There is no rapist; it is just a person who raped.

There is no criminal, it is just a person who committed crime.

There is no cheater; it is just a person who cheated.

所以,當生氣時,唔好再諗令你生氣既人的樣子,咁只會令自己更生氣。

而我聽過無數咁多法師對治脾氣既辦法,都係話要觀察脾氣。觀察脾氣既生起,觀察脾氣既熄滅,只要正念生起,脾氣自然消失得無影無踪。Well,我既修為有限,從來無試過成功...如果有朝一日我真係成功既話,一定會仔細報告。

戰無義戰,脾氣亦無「正確」既脾氣。脾氣只係自己情緒失控既証明。即係話,發脾氣係又一次打敗仗既証據。依個世界上,如果我地真係有d乜野敵人既話,敵人應該就係自己。

願各位都可以戰勝嗔怒,令世界和平!

13 則留言:

s-pig 提到...

Samsara姐姐,

這一篇,好好好呀!
我都經常提醒自己,要好好控制自己既脾氣,唔好咁容易嬲,咁容易'上火',但係次次好嬲既時候,又係唔記得,其實好多時,真係激親自己,又幫唔到件事呀!

Carole 提到...

脾氣只係自己情緒失控既証明。
---> ai
我一有野唔順意 就會發
仲會手震tim

Gideon 提到...

哈哈我反而好鐘意呢句 There are no stupid questions, only stupid people. 除左康小姐之後, 冇乜人可以迫倒我發脾氣,但係我就經常地激到人手震,頭頂噴煙.....

Morca 提到...

我都係燥底, 飲多啲涼茶先...

火鶴 提到...

我都係燥底, 無得醫.

Barry 提到...

控制情緒,唔好俾情緒控制,失控就麻煩。

Samsara 提到...

小豬妹妹:
>>真係激親自己,又幫唔到件事呀!

超!級!贊!成!脾氣真係成事不足,敗事有餘。發洩左出來好似好爽呀嘛,搞出來既鑊,都係要自己收拾,真係苦果自嚐。

Carole姐姐:我會個心跳得好厲害,天曉得我有冇遺傳性心臟病。

鎚...依個名,咁滴汗...如果康小姐激唔嬲你就大件事啦!你係講你深圳同事?我諗一來要manage自己既expectation,二來要明白大家既溝通係有好高既難度既,所以更加要go down to the exact details.

Morca姐姐:依句咁熟既,你同七十一齊去飲?

大俠:世上無難事,只怕有心人...你覺唔筧燥底唔好先?

師兄:係啦,我成日都自惹麻煩。

匿名 提到...

Samsara 姐姐,

見你講脾氣,我隻手又好快咁去按左錄影機個 rewind 掣,因為我都係燥底。

回想返好幾年前,或者真係因為自己既脾氣太差及妒忌心,將一段發展中既感情破壞左,當然,一條鎖匙係唔會嚮既,始終我都係一個平凡人,貪嗔痴對我都絕對有好大影響。正如你所講,脾氣從來都幫唔到件事,只會對件事產生無限大既破壞力。

脾氣除左破壞左一段感情外,亦都成為左事業上既絆腳石,雖然知道係唔好,但係面對住一 D 極之離譜既問題時,脾氣又自自然然咁被掀動。

而家一俾人激親時,會走開諗下究竟個問題係邊先?如果個問題唔係自己度,咁又何必搵自己黎唔開心黎發脾氣呢?

好鍾意呢一段〝無論一個人表面上睇來幾強悍或邪惡,骨子裏,其實都只係凡人,一樣會覺得痛,內心充滿不安,渴望別人重視,渴望別人無條件既接受〞,人其實係好孤獨,好渴望別人既重視及認同。

火鶴 提到...

sara,

我覺燥底唔好, 但覺谷住仲唔好.

Samsara 提到...

獅子哥哥:過去左既就由得佢過去啦,只要有從中學習,我覺得都係一件唔錯既事。把握現在就可以創造自己既命運。

大俠:燥底唔好,谷住仲唔好,爆完酒樽之後發現自己持勢斯人仲衰,傷害到自己至親至愛仲好想死。

Clay 提到...

睇到天要下雨,以為娘要嫁人又發脾氣tim..

發脾氣通常都只會壞事。有時先諗後果可以戰勝情緒(如果你足夠冷靜)。

火鶴 提到...

有無咁嚴重呀?

Samsara 提到...

若虛弟弟:我地唔好比情緒牽住走呀!

大俠:嗯,脾氣依家野呢,你越熟既人受得越多,佢地亦都係最唔同自己計較既人,但唔計較唔等於無傷害。