雜雜雜想

今日同妹妹食飯時，潮童話佢睇報導，大陸各省巿都要申報因為三聚氰胺而引發既賢石個案，各省巿為左自己有個「乾淨」既報告，所以將賢石既定義大幅調高，搞到明明有賢石都變左無，咁佢地就可以安安樂樂繼續玩樂。

上有政策下有對策依個情況，都唔係話今日共產黨先有，咁多歷朝歷代，未都係咁。但係，依家偉大的中國人連太空漫步都做埋，話自己全球排第三，小小既食物安全同行政能力，都仲係同清帝差唔多，係咪真係好瘀呢吓？

***

我呢，今次中晒招，我在公司用蒙牛來沖咖啡，足足飲左一年，仲要為左今自己飲少ｄ咖啡，所以杯杯都係多奶少啡既latte。

唉，都係等小朋友check左先啦，真係可憐天下父母心。

***

近幾年大陸食品既問題，真係全民化學科普教育，連我阿媽都可以好流利地講出「三聚氰胺」依個咁難讀既term，仲要我一話唔返屋企食飯時，佢就大力恐嚇我，話出面食野樣樣都有加三聚氰胺喎…

仲要當我考佢化學常識時，一講「蘇丹紅」，佢就接話「孔雀綠」。哇，對得幾咁工整！

***
有朋友話，做臣子既，「恐其見棄，死其見疑」喎。

我其實不過打份工姐，唔係古代伴君如伴虎既大臣，駛唔駛咁戰戰兢兢、鞠躬盡瘁呢？

又何解人同人之間有咁多衝突呢？

好耐之前PK_寫過類似話我地做細既，其實都係serve緊老闆既insecurity。因為老闆自己無安全感，所以proposal, back-up plan, report無日無之，寫完一個又一個。因為老闆們擔心自己既地位不保，所以公司分黨分派，辦公室政治之下，日日都在度打不流血既戰爭。

打生打死，為乜呢？除左升職加薪依ｄ比較solid既野之外，好似都係為左安全感。

***
之前聽過一句說話：「如果你怕死既話，你就怕生存」。

係喎，Life is uncertain, death is certain嘛。魯迅講過一個故仔，話有一家人生左小朋友，在擺滿月酒時，有個客人話BB一定大個左聰明靚仔彈琴勁過郎郎跑步快過劉翔，仲會成為第一個登陸火星既人類，主人家聽到就相晒喎，請個客人去貴賓席。

另外一個客人一見到BB，就話：「依個bb遲早一定會死。」主人家一聽到就好嬲，一ｄ都唔信，即刻趕佢走…

其實，要講無安全感，真係無乜野得人驚過死掛，但既然Death is certain，咁我地一日到黑在度驚都係無謂謂啦！如果下下活在自己既不安恐懼之中，咁我地就從來無真真正正生活過，白過一生。

***
我有個朋友既爸爸過左身，今日出殯。

雖然，佢患癌已經一段時間，大家都有心理準備，但係生離死別始終係一件令人難過既事。

死者已矣，最重要既，係仲在生既人吧。可以把握既時候，就好好把握，好好享受同處既日子，千萬唔好：愛得太遲。





***
題外話，我上個禮拜在上海係上到蘋果日報既，連殘奧都完左都未block蘋果網，係咪，都仲有少少既改善呢？