2008年10月27日 星期一

食物銀行

愛民邨粥檔老闆派粥比老人家既善舉,相信感動左好多人。連日來,不停有人損錢損食物去幫襯加油打氣,真係人間有情。

老闆,真係好野!


其實我地如果想幫助有需要既人,其實仲可以考慮直接向食物銀行捐款。

其中一間,係聖雅各福群會既既眾饍坊

眾饍坊只會接受由團體轉介,證明真係有需要既非綜援的低收入家庭、失業、家庭遇突變的家庭、露宿者、「五無」人士。佢地會乜野叫做五無人士呢,就係即無強積金、無退稅、無老人金、無兒童及無直接交電費的人士。

香港今次又威到盡啦,香港既貧富懸殊係亞洲第一,堅尼系數0.533!除左老人家之外,在職貧窮係另一個問題,佢地唔想攤大手板同政府攞綜緩,但係真係窮到無錢開飯,如果等特首出手,掟多一籮蕉都無用,靠曾蔭權真係等到餓死都未等到啦!

捐款可以下載表格之後去7-11比錢,寄返收據比佢之後,除左有正式收條等你可以退稅,仲會送一隻靚靚水杯比你添呀!

5 則留言:

seikomatic 提到...

師妹,留言兩貼:

每個人既消費模式可以好唔同,廿蚊個早餐對俺泥講,真系高消費,但系電視上面平民茶餐廳既客仔又唔小。

俺記起四五六十年前學校餐廳見過有人用牙籤督人地食淨果d 碟頭送尾,覺得好奇怪,後來沙士期間阿伯系街邊執雞尾煙,阿婆用膠袋泡制大塊樂老麥家香雞,就知道事態嚴重。

林林下,食物銀行比派錢好,因為有人可能力左份糧去做其它野,例如借比個仔買匯豐。

ondog 提到...

Done.

Samsara 提到...

大師:係呀!送食物真係好過比錢嫁,我阿媽話,人地乞錢你可以唔比,但係如果人地係問你攞野食物就一定要比喎。

想當年我同佢一齊去大陸旅行,去到一個專賣素包既店,阿媽買左兩個諗住返去酒店食。點知行行下有個女人帶住個六七歲既女過來問我地攞錢,我地唔比,咁,佢就問我地攞包...阿媽好痛苦地比左佢...我阿媽食素既,難得買到素包自己一啖都未試過...就比左人。但係,你比錢唔知依個女人點用,你比包佢,個小妹妹應該會有得食。


On Dog哥哥:Well DONE!!!!! 我昨晚一返到屋企就知好鬼bad timing,股市跌到四腳朝天,滙豐得返$75!

但係,昨晚有線新聞亦都報話慈善團體籌款大分困難,有食物銀行唯有每次只比人攞少d食物,同埋入少d「貴價」既肉類罐頭。

On Dog哥哥真係好心地呢!

唔駛怕羞,為善要讓天下知!因為,大家都需要一d鼓勵。

南區肥龍 提到...

DONE X 2.

Samsara 提到...

肥哥哥:多謝!人人都可以仗義嫁,特別依家正是雪中送炭既時候。