2007年9月4日 星期二

金庸的道理(二) --- 七傷拳

倚天屠龍記中,金毛師王謝遜全既父母妻兒,弟妹僕役,全家一十三口都被佢既師父成昆所殺;為左報滅門之仇,謝遜不惜殺人強搶崆峒派既鎮山拳譜,苦練「傷敵之前先自傷」既七傷拳。

七傷拳一拳之中有七種力,中拳後敵人往往會內傷;但係要練出依七種力,係會傷成人體既陰陽二氣,同埋金木水火土五行;所以在傷人之前,首先要自傷。謝遜為左報仇,一於唔理咁多,自傷就自傷,不停咁練,搞到傷左心脉,時不時狂性大發,有次差d想殺殷素素,結果比素素打盲對眼。

雖然金庸d飛天遁地既功夫都好老作,但係依套拳真係好科學,連牛頓都贊成。

牛頓既第三定律,就正正係Actions equals to Reaction───作用力等於反作用力。比如你一拳打落心口,拳頭同心口所接既力係一樣既,只係方向相反。不過因為拳頭硬過心口啦當然,所以人地個心口會痛過你個拳頭囉;但係就算咁,自己既拳頭一樣係受到傷害。

又有好多硏究發現,負面情緒影響我地身體既機能、消化同新陳化謝,On Dog哥哥就有一個例子。仲有一個硏究發現,負面情緒係會令身體產生出大量毒素,如果將一個人在好嬲或者好憎恨人既時候抽d血出來,再注入白老鼠身上,白老鼠係會毒死嫁,你話幾恐怖。

所以,你話啦,要憎人害人,係咪真係要首先害左自己先?其實仲記仇來做乜呀,你唔原諒其他人,佢其實係不痛不癢既,但係你心中既忿忿不平就會令自己訓唔安食唔落,仲有害身體喎,幾咁唔抵呢。

所以有人講:原諒別人,其實係放過自己。

唔好再練七傷拳啦!





係,好老土,不過係真既,唔該比比面,唔好柴台啦,多謝!

又:
On Dog哥哥提供---葵花寶典仲死!
(唔係我講嫁,我quote嫁咋。咩姐,大不了唔比淑女勳章我!)

16 則留言:

匿名 提到...

哈哈...

葵花寶典仲死!

C.M. 提到...

睇黎,姐姐今日都有好日子播。

Samsara 提到...

On Dog哥哥:哈哈,係喎,依個仲絶。

CM哥哥:我今日同人放左兩次拖喎,仲有妹妹屋企有事,搞到我好心up,不過,唔忙咁囉。

匿名 提到...

哈哈‧‧‧

七傷拳都仲有得醫,葵花寶典同辟邪劍法都冇得醫,幾近同歸於盡攬住一齊死。

匿名 提到...

Samsara姐姐,

咁如果以武功而論,似乎都係練太極拳好...延年益壽...

咁當然...依處係講緊報仇...而立場上又覺得報仇唔係咁重要,所以就顯得七傷拳好似好蠢咁...之不過換一個角度,人生有d野,可能就係值得付出一切既代價,犧牲...包括生命...咁...睇落去,七傷拳又好似無咁蠢...

洛克 提到...

samsara 妹妹,

不如寫下我最得我喜歡既段譽,

才能高(蕭峰?),志向高 (慕容復?),

都比不上行運好.

好命水才是真理.

匿名 提到...

佛學著重的因果論在設計蕭峰和幕容公子兩個角色的時候已經變成宿命論了。

一個身負血海深仇,一個有復國大業。明明是來受苦的,走的每一步都是命中注定。根本不可能馬後炮地希望他們突然開悟,摒除恩怨,立地成佛。

現實生活裡頭你越謙卑,賤人越愛食住你,找你麻煩;你越表現沒有所謂,更多人要在你身上搵著數。你經常去原諒別人,何解人家又經常唔放過你?!

你有悲劇般的命運,可能你本身早有性格缺憾(悲劇小說的要義)

絕對唔係柴台,只係分享一下生活體驗。

王老五

Samsara 提到...

獅子哥哥:唔係同歸於盡,而係犧牲...都係唔講啦,淑女勳章離我越來越遠。

AK哥哥:「似乎都係練太極拳好...延年益壽...」...好有骨呀吓依句,你潤緊邊個先。

值得犧牲一切?乜野來先?條命唔要都算啦,但係謝遜直頭係搞到short左,隨時喪心病狂喎,有好多野仲可怕過死。

你知唔知上昇星座係點解嫁?上昇星座係面具,表面上睇來係上昇星座,但係太陽星座先係真正既自我,越似上昇星座會越唔開心,因為咁樣會離真我越來越遠。

洛克老闆:今日d男人做乜個個講野都咁有骨?都係等我直接講啦。

段譽?我比夠五個妖佢,一個大男人,佢最叻既武功係乜野呢?竟然係淩波微步!!!一有事佢就第一個著草,又樣樣野都不勞而穫。

不過,你好似仲好妒忌佢既皇帝命喎,可以坐擁咁多美女,有性格既又有、柔順既又有、仲有靚爆鏡但係敲落個頭空空聲既王語嫣...啊,你講真心話呀你...聽扭耳仔啦!

王哥哥:誤會、誤會,佛家相信有輪迴,任何有情眾生都係死唔去既,死完會再生。所以,今生見到既只係生命流轉既一小部份,不能作準。

咁,依個係理論無證據既,如果有證據又或者有辦法證明佢係錯既話,佛學就唔會係宗教/哲學,而變左科學啦。唉,你估我做乜叫Samsara呀,我好苦惱呀依個問題。

仲有呀,佛學係相信種其因得其果,即係話你今日既作為,就係種下你明天既結果,亦即係講,人係可以完全掌握自己既命運既,亦都要對自己既言行心念百份百負責。。。係咪好positive呢?

而且,佛講既係要慈悲同智慧兼修,唔好盲信,亦唔好送死。

唔好意思係度借題發揮,我都知我講d野唔岩聽嫁啦。

不過趕客都照講。

匿名 提到...

「不過趕客都照講。」

點會 「趕客」?

思想交流很重要,難得o甘多三唔識七在分享彼此對事物o既不同睇法。

精神生活冇衝擊就好dry ga la 個人!

老五 

黑人 提到...

練甚麼拳都是其次
重點是那人為甚麼走去練
東方不敗活在一個權力叢林中,不是吃人就是被人吃掉

林平之處境也差不多,他們是不練不行

謝遜當時生存唯一剩低的意義就是復仇,七傷拳對他來說,是人生最後一個希望,對於生無可戀的人來說,小傷大傷又如何

反觀張無忌,先有兩種奇功襯底,他學太極拳只是錦上添花,反正要拼起命來一樣有贏面
心態跟前面三人自是不同

他練太極拳當然有得著,換成謝遜或林平之就沒幫助了

不是人人都能夠有海闊天空那種餘裕

火鶴 提到...

sara, 計我話呢, 強迫自己唔去記仇, 仲痛苦.
有時, 仇人會俾到我哋原動力去進步, 今日上司欺壓我, 來日我會做番你上司, 看你怎麽樣.
我承認, 我記仇.
但報仇, 唔駛用七傷拳.

點解sara你成日睇上昇星座嘅? 不如睇月亮星座仲好啦.

(段譽? 我比夠五個妖佢) X 2 = 10 個妖
睇陳浩民一日到黑响到叫李若彤做神仙姐姐神仙姐姐.. 直頭想一巴車埋去.

匿名 提到...

前幾日聽個 presentation 知道一個人壓力大,皮質醇會破壞個腦。奈何多年來相信,自己這個軀體是靠妒忌仇恨等負能量作為燃料的。

匿名 提到...

Samsara姐姐,

AK點敢講野有骨潤人呢...只不過係有d時候,AK真係覺得...要完全消除一d人既負面感情,誠如火鶴兄所講,係更加痛苦既一件事...

上昇係經過社會入面既洗禮之後得出既結果,月亮係潛在於內心既本我,太陽係天生用以面對世界的表面...AK覺得,三者都是我...無真假之分...

seikomatic 提到...

有情..........到過

Samsara 提到...

王哥哥:你不如試吓寫Blog啦,包你有強力精神生活衝擊,不過,一入侯門深似海嫁依度。

黑人哥哥:東方不敗當年穏坐第二把交椅嫁喎,係佢自己野心大想換代任我行,比任我行睇出先至「醒」葵花寶典過佢。

林平之就仲衰,為左報仇乜野手段都駛得出、乜野人都可以利用,佢可以揀做人唔係做得咁衰格掛。

係咪天空海闊...你睇下令狐沖未知囉。佢比自己師父害到雞風鴨血、比正派人士迫害、比女飛、比人費埋武功...都一樣咁豁達,真型。

火大俠:你終於出現!唔係迫囉,無得迫既,係真正放開。仇恨化為動力?都得既,但係個過程其實自己都好辛苦,到你真係報到仇,依個果實又無想像中咁甜美,仲要甜一兩日咋,之後又覺得原來都不外如是,咁囉。

星座我唔識嫁其實,之前三分鍾熱度係咁意玩過吓囉,不過AK哥哥已經答左我個問題啦。月亮星座咁複雜嫁咩?我月亮都係獅子,唔駛睇啦。

講起天龍真係有好多勁骨痺既名,除左神仙姐姐,仲有夢郎夢姑...Help!

Out of syllabus:吓,燃燒負能量,好快燒晒嫁,好慘嫁。你係男定女?睇來男人仲記仇過女人。

AK哥哥:車,我又唔會對號。我覺得唔係做唔到,係唔想做姐,你個賣淨蔗理論真係好岩囉。

三個都係你???差好遠喎,咁未好分裂囉。

大師:你又唔睇金庸又唔睇洪金寶,你細個時鍾意睇乜野書呢?

莫非係唐詩宋詞三百首所以你咁有才情?

seikomatic 提到...

今生.....如果仲有印象,完全睇完既只有一本2xx頁既英文書,同一本英文教科書,(中小學教科書無數唔計)其它就連90%公仔既都睇唔晒...真系寧縱勿枉。