快樂多角度(1) - 尋找快樂的故事

本來吾諗住幫依部戲開post，但係我周圍既留言好零散，都係坐低慢慢講我既睇法．

單憑部戲個名，我都一定會入場睇，尋求快樂喎，咁緊要，一定要睇下點樣先可以揾到．

個故仔，其實真係好勵志，Chris作為一個單親爸爸，在極度貧困既情況下，仍然努力工作，主動爭取一切機會，仲要同時可以做一個無微不至既好爸爸．在咁困難既情況之下，當Chris最後終於都爭取到果份佢夢寐以求既投資公司經紀一職，我都好感動，好開心呀．Chris咁努力，今次個天真係無玩佢啦．

但問題係，部戲就咁就完．只係打出字幕，交代話Chris從此平步青雲，賺了很多很多錢．然後，戲院就開燈．

係燈光下我都幾錯愕，吾係呀化，所謂既開心，就係揾到份工果刻，同之後揾到好多錢？只係依個程度既話，部戲應該叫 The Pursuit of Success，或者 The Pursuit of Money，甚至再俗d，叫American Dream算啦．

當揾到份工時，就緊係high啦．廿個揀一個喎，咁都爭贏，真係好似金榜提名，中左狀元咁呀；以後既生活又有着落，吾駛同仔仔再流落街頭，當然會好開心啦．果日，依個世界一定係玫瑰色既．

但係，第二朝呢？依種一登龍門既興奮，真係吾可以維持得幾多日．興奮過後，跟住來既係咪就係壓力呢？投資公司係一個高度競爭性既工，吾好話要出人頭地；就算只要保住個飯碗，都真係要出儘全力．好啦，佢揾到份工，有糧出啦，玫瑰色既魔法就開始慢慢退色．Chris又返到現實既世界．

當Chris全力併榑時，佢仲有冇時間同個仔打籃球同傾偈呢？成部戲之中，除左揾到工果個狂喜之外，阿Chris最開心既，肯定係同個仔一齊既時間．

就算為左慳錢去到餐廳自己吾食飯，但係Chris望住仔仔食得咁開心，佢都笑得好幸福．又比如佢地兩父子搞到要在洗手間過夜之後，第二日要終於揾到露宿者之家，可以真係有熱水有電，阿Chris幫仔仔沖涼果一幕，真係温馨到心都暖曬．咁，當Chris揾到錢，有大把玩具，大把工人，但係就無時間倍個仔時，阿仔又係咪開心？Chris又係咪開心？

我吾係嫌錢腥，亦吾討厭有錢人．要維持基本既生活係一定要錢既．我諗如果仔仔再大少少，佢絶對吾會再想返去洗手間度訓，當係玩山洞遊戲．

但係錢，真係只係錢，只需要適量就夠．李兆基曾經在專訪中講過，不貧不富既人最幸福．窮人吾駛講，福人其實都有好多煩惱．因為太多人揾佢，仲會「匹夫無罪，懷璧其罪」．過左某一數目，錢反而變成負擔．而如果為左錢而犠牲左家人，朋友，健康，咁就真係好吾抵啦．錢就話可以揾得返姐，但係健康同心愛既人，仲係咪可以隨時返來？

如果部戲再講落去，講話Chris在揾到錢之後又有d乜野領悟，咁先係尋找快樂的故事嫁嘛．

大導不如出績集啦！

其他人又點講：
Justin
On Dog
思哲
七十樓危危下望: The Pursuit of Happyness II