安全感

朋友W話佢凡事都作最壞打算，永遠有back-up plan．返每一份工時都會為如果有一朝一日間公司倒閉，又或者炒左佢而作好心理準備－－－就算老闆對佢好好，就算間公司好賺錢．佢仲賣曬各式保險，會蓄好多錢先退休，佢話咁就帶比佢安全感．

朋友C雖然外表自信豪爽，相識滿天下，但卻說如果佢見到有兩個人在飯局中交頭接耳，大聲講細聲笑，佢就覺得佢地係笑緊佢．

朋友H自大學畢業後仍不停進修，攞多二個Degree，一個MBA．佢轉左兩次行，寧願由低做起．永遠揾緊最大需求，最不能被取代既行業．

我呢，自畢業後大部份工都係manufacturer，決心要做工廠妹．但係工廠不斷北移，我又不肯返大陸，係咪好快會比平靚正既同胞取代？

如果要講世事無常，又點止依ｄ野咁簡單？全球暖化、北極ｄ冰忽然溶曬、禽流感、日日都有可能爆發．

又話吾埋聽日阿儍佬金正日吾小心禁錯制，咁就核爆．

又或者科學家忽然發現有個超大彗星在一個星期後就撞向地球，時間太迫切，連Bruse Willis都救吾到我地．

又可能地球又忽然無曬ｄ磁場，臭氧層一下子無曬，地球直接受到太陽同宇宙射線真接照射，所有動植物吾死都要生cancer，地球只剩返細菌同甲甴．．.


我地係咪真係太好想像力，又學似杞國之人咁，成日擔心個天會崩塌呢？

其實，係個世界吾安全，點自己個心不安呢？