2007年3月7日 星期三

愛他?愛她?

以前讀書時要在畢業果年做一個社會問題既硏究,可以自由組合成四至五人既小組,而題目就吾可以同以前師兄師姐既重複,而我地揀左女同性戀硏究.

揀依個題目其實都真係幾有策略性考慮既,事緣依個硏究大家最叫苦連天既係成日會比老細(負責既Lecturer)要求做問卷調查.

淨係設計份問卷已經諗到頭都大,仲要周圍揾人幫手填問卷,收返來既資料又永遠亂曬龍,一d correlation都無,份份問卷都係noise,結果次次都要自己填返d問卷出來,夾硬砌出個結論.我地個老細仲要係教統計既添,同學生鬥智鬥力咁多年,我地真係呃吾到佢.

而揀女同性戀依個題目,就一定吾駛做問卷啦.如果真係在街度問人係吾係Lesbian,有可能比人打不突止,仲可能問一百人都無一個肯認.加上我地依組係全女班,而老細係男人,咁就真係我地點講都得啦,只要吾好太誇張同反智,講女同性戀我地依四個女人一定權威過我地個男老細啦.我地話女人係咁,佢都一定無得駁.

到收集資料既時候發現關於男同性戀既硏究就多,不過女同性戀就真係無乜,連外國都吾多,所以都係用一些台灣既刋物同資料來充數.而經過十分一會既轉介,才認識一些女同性戀者,才知道原來在六四吧每個月既第二個(定第三個)星期六下午都有女同性戀者聚會,而且歡迎外來人參加.

我地知道左其實都好興奮,女同性戀者集會喎,真係吾好意思都要坦白講,真係有d尋幽探秘既感覺.我地個老細知道左其實都好想去,但問清楚先知道真係係人都去得,不過只限女人.Well,既係依個集會係男人與狗,不得進入.

依個集會其實無我地想像中咁剌激,來既人好多,有大既四五十人,塞滿曬成個塲.中間除了有d擺到明係TB之外,多數人都睇吾出有乜特別,而且有d都真係好斯文同靚女添.搞到我有d懷疑會吾會有好多人好似我地咁係來做功課嫁呢?

咁個氣氛呢,可能因為全部都係女仔又好迫既關係,所以都幾Close同好著重Sharing.每個人都會同其他人笑,而就算有人演講,都不停要大家講意見.

集會完畢之後,大部份仲一齊吃飯同糖水.不過真係冇乜特別炸喎,咪好似平時同d吾識既人吃飯咁囉.咁多人,你都只可以同附近三幾個人傾嫁啦.而且我肯定餐廳其他人吾會睇得出依個係Lesbian集會囉,大家無論話題同行為都十分正常.

咁我地就無驚無險地交論文同Present,睇其他組比老細插個問卷設計有問題,sample抽得吾夠random,data分析得吾正確...我地就好自豪地諗我好彩我地醒目揀依個題目,好輕易地就過到骨.

而最出乎意料既係我由於不停地同人講我而個功課既內容同活動,有一個大我一年既師姐結果話比我知佢係Lesbian.師姐真係樣靚身材正,電一個好性感既短頭髮,戴藍色Contact Lens,著衫自然又靚,仲有超強電力.佢對眼真係識講野,無論男女都會比佢電親.

嚴格d來講,佢係bi-sexual.之前同佢拍拖既都係男人,但係佢發現自己都係鍾意女人多d.果次Lesbian集會佢都有去,佢咁靚女,真係見到吾少人approach佢,而結果佢真係同其中一個拍拖囉.

我吾係太肯定師姐究竟係因為之前d男友令佢太失望先有依個轉變,定係佢不嬲都有Lesbian傾向而吾自覺.佢自己就話佢中學既時候已經開始覺得自己有d鍾意女人既傾向喎,而且佢都好明顯地同果個女仔一齊之後,個人開心同積極左.咁,佢開心就得啦.

而家同師姐因為各有各忙,我又吾見幾次電話,已經無再聯絡囉.不過我有時都諗,如果愛真係無私同盲目既,咁一個人咁岩愛上一個同性既人又有乜咁出奇呢?

如果一個人話愛一個人既時候,佢吾介意對方既地位,身家,外表我地就話佢偉大;但係如果一個人話佢愛一個人時吾介意佢既性別,點解就會比人話佢濫交呢?

又,如果你在自己十零歲青春期最需要朋輩支持既時候,發現自己同其他人吾同,咁你話幾驚同難受呢?

我地又可吾可以比多少少包容,吾好咁歧視佢地呢?

10 則留言:

匿名 提到...

我都好同情同性戀既人既情況,雖然我咁講就俾我一些同性戀既人話,話講到佢地好似係有病咁,要我可憐佢地同情佢地。

我對同性戀係完全唔反對的。

但同時覺得佢地受左好多壓迫。唔敢同家人講。唔敢公開講。又因為同性戀既人既對象已經少(得十分一),佢地既情緒好難得到宣泄。

佢地都係正常人者。同埋,佢唔講我都估唔到佢係基既添。

Samsara 提到...

我都吾係要同情,只係平常心同埋接受有人係同自己吾一樣囉.

十份一既硏究只係針對男同性戀者,而且有好多人挑選依個結果(認為冇咁多).女同性戀呢,好似仲未有數仔出到喎.

匿名 提到...

"不過我有時都諗,如果愛真係無私同盲目既,咁一個人咁岩愛上一個同性既人又有乜咁出奇呢?"

上次愛的人, 是一個姓別. 只是今次遇上的, 剛巧換了另一個姓別...愛的本質還是不變的.

是這樣嗎?

火鶴 提到...

>> 如果一個人話愛一個人既時候,佢吾介意對方既地位,身家,外表我地就話佢偉大;但係如果一個人話佢愛一個人時吾介意佢既性別,點解就會比人話佢濫交呢?

sara, 你講咗我想講嘅嘢.

「我鐘意邊個, 同邊個拍拖, 關你咩事呀?」
絕大部份人都認同自由戀愛, 自由戀愛包不包括同性戀呢? 如果唔包括, 咁, 又何來自由戀愛呢?

同性戀人, 同異性戀人無分別, 一樣都會為愛付出, 而佢哋要承受嘅壓力要比異性戀人大好多, 佢哋淨係呢種對愛嘅堅持同承擔, 已經好值得人敬佩.

呢個世界, 實在有太多偽衛道之仕.

阿爾伯特 提到...

如果真是發生了,除左包容,真係無計!

始終,同性相斥,異性相吸,方才合乎自然定律

或許,這是上天控制人口增長其一方法......

匿名 提到...

Samsara姐姐,

睇完依一篇,記起白先勇既孽子,同埋依一首歌...

忘記她 是那麼樣 只記起風裡淌漾
玫瑰花盛開的髮香
忘記他 是那麼樣
只記起寬闊肩上 紋上鐵青色的肖像
忘記她 是那麼樣 只記起街裡闖蕩
迎我歸家溫馨眼光
忘記他 是那麼樣
只記起粗糙頸項 承載鋼鐵一般堅壯

愛上是他是她是他給我滿足快樂
是那份美麗的感覺
愛我是他什麼是他不理上演那幕
忘記他是她不知覺

忘記她 是那麼樣
只記起掩蓋荒靜 柔軟繞心間的笑聲
忘記他 是那麼樣 只記起灑脫不定
如烈火紛飛的率性

愛上是她是他是她給我滿足快樂
是那份美麗(複雜)的感覺
愛我是她什麼是她不理上演那幕
忘記他是她不知覺
愛我是她什麼是她不理上演那幕
忘記她是他不必覺

Samsara 提到...

j.s:都可以咁講嫁,我師姐就exactly依個情況.

火大俠:類似既情況仲好多呢,偽衛道之士有巿塲lo.

Albert:對於同性戀的成因,真係有十萬個解釋,不過,我地個社會如果可以包容d,咁大家都會開心舒服d.

AK哥哥:哈哈,我寫依篇文時真係諗緊依首歌呀,所以個title咪改成咁lo.

阿爾伯特 提到...

Samsara小姐真好,很用心回覆每個"意見" ^.^

匿名 提到...

令我想起日前那個「不要婚前性行為」的宣誓活動

Samsara 提到...

Albert:其實下面的水仙花係同性戀的另一個解釋,不過我覺得幾吹水.

數怪哥哥:講到同性戀性行為就仲搞笑.男同性戀性行為都清楚d,但係女同性戀性行為就真係好難define,我諗起克林頓就真.